Գյումրիի JAZZ CONNECTION-ում կմիավորվեն տարբեր երկրների ջազ-վիրտուոզներ

Երևանյան երկու համերգներից հետո «Ջազի հայկական ասոցիացիա»-ն և «Մեցցո Պրոդաքշն»-ը ջազային տարափ է խոստանում նաև մշակութային մայրաքաղաքում: JAZZ CONNECTION նախագծի շրջանակներում Գյումրու դրամատիկական թատրոնի բեմում կմիավորվեն տարբեր երկրների ջազ վիրտուոզներ՝ Սերգեյ Մանուկյանը (Ռուսաստան), Վահագն Հայրապետյանը (Հայաստան), Լորեն Ռոբինը (Ֆրանսիա):

Ջազի երկրպագուներին սպասվում է ջազային համերգ-տոն, որի շրջանակներում կրկին մեկ բեմում կմիավորվեն ջազի վիրտուոզները՝ ջնջելով բոլոր սահամնները՝ Ռուսաստան- Հայաստան-Ֆրանսիա:

Արվեստը սահմաններ չի ճանաչում, առավել ևս' երաժշտությունը: Այս խորհուրդն ապացուցելու համար ջազի վիրտուոզները միավորվել են «Արվեստը սահմաններ չի ճանաչում» գաղափարի ներքո: Այս մասին մինչ համերգը, Գյումրու «Ջազ ակումբ»-ում տեղի ունեցած ասուլիսի ժամանակ նշեց «Ջազի հայկական ասոցիացիա»-ի նախագահ Կամո Մովսեսյանը:

Նախագծի գաղափարը ծնվեց անցած տարի Երևանում կայացած «Երևան Ջազ ֆեստ»-ի շրջանակում: Նպատակն է ջազային տոներ կազմակերպել ոչ միայն Երևանում, այլ նաև Գյումրիում ու հանրապետության այլ վայրերում: «Այս նախագիծը՝ JAZZ CONNECTION-ը, «Ջազի հայկական ասոցիացիա»-ի հերթական նախագծերից մեկն է: Կփորձենք նաև համերգներ, նախագծեր, ինչու չէ՝ նաև ջազ-փառատոնի մեկ օրը տեղափոխել Գյումրի: Դա ոչ միայն Գյումրիում է կազմակերպվելու, այլ նաև հանարպետության այն քաղաքներում, որոնք այսօր խնդիր ունեն նման երաժշտության պրոպագանդման: Փորձելու ենք այդ բացը լրացնել»,- «Արմենպրես»-ի հաղորդմամբ՝ նշեց Կամո Մովսեսյանը:

Աշխարհահռչակ ջազ-վոկալիստ, դաշնակահարն ու երգահան Սերգեյ Մանուկյանն այս օրերին Գյումրիում է՝ «Վերածնունդ» միջազգային փառատոնի ժյուրիի կազմում: Արդեն հասցրել է ծանոթանալ ու «հասկանալ» Գյումրին ու գյումրեցիներին, որտեղ ամեն ինչ այլ է: «Այս քաղաքում ամեն ինչ այլ է: Առաջին անգամ չէ, որ Գյումրիում եմ: Անցած տարիներին էլ եմ մասնակցել մրցույթ-փառատոնին ու այնպիսի տպավարություն է, որ մրցույթ չէ, այլ ընկերական մթնոլորտ: Ու սա միայն երաժշտությանը չի վերաբերում, այլ մարդիկ կարողանում են այստեղ այնպիսի մթնոլորտ ստեղծել, որ ամեն ինչը շատ ընկերական է ու տրամադրում է համերգի»,- նշեց Սերգեյ Մանուկյանը:

Խոսելով նախագծի մասին, Սերգեյ Մանուկյանը փաստեց, որ այս նախագիծը գերազանց ու լայն հնարավորություն է ընձեռում ջազմեններին՝ ներկայանալու վոկալ և գործիքային, միայնակ ու համատեղ կատարումներով:

Վահագն Հայրապետյանն էլ վստահեցնում է, որ հայկական ջազն ամենուր էլ ընկալվում է որպես հայկական ջազ, քանի որ այն ունի հստակ ձեռագիր: «Ջազն իմպրովիզացիա է՝ կյանքի նման»,- վստահ է Վահագն Հայրապետյանը:

Ասուլիսի ժամանակ լրագրողները ցավով նշեցին, որ կապված որոշակի դժվարությունների հետ, հանրապետության երկրորդ քաղաքի միակ ջազ-ակումբը դադարեցնում է իր գործունեությունը: Սա դա նաև հենց երաժշտական հատուկ ճաշակի մարդկանց նվազման ու այս արվեստի ոչ լավ պրոպագանդման մասին է խոսում: Այս երաժշտությունը սիրել է պետք, ջազը տարածել մեր օրերում միայն նվիրյալների օգնությամբ է հնարավոր: Կամո Մովսեսյանը վստահեցրեց՝ «Ջազի հայկական ասոցիացիա»-ն կփորձի աջակցել:

Ասուլիսի ավարտին Կամո Մովսեսյանը նշեց, որ ի դեմս Մկրտիչ Մանուկյանի՝ «Ջազի հայկական ասոցիացիա»-ի այսուհետ ներկայացուվիչ կունենա նաև Գյումրիում, իսկ Սերգեյ Մանուկյանն այսուհետ «Ջազի հայկական ասոցիացիա»-ի պատվավոր անդամ է:

JAZZ CONNECTION նախագծի շրջանակներում Գյումրու դրամատիկական թատրոնի բեմում կմիավորվեն տարբեր երկրների ջազ վիրտուոզներ՝ Սերգեյ Մանուկյանը (Ռուսաստան), Վահագն Հայրապետյանը (Հայաստան), Լորեն Ռոբինը (Ֆրանսիա):