Կեղծամակնիշ ապրանքների տարեկան համաշխարհային ծավալը գնահատել են 461 մլրդ դոլար

Կեղծամակնիշ ապրանքների առեւտրի ծավալն աշխարհում 2013 թվականին կազմել Է 461 մլրդ դոլար, ինչը հավասար Է համաշխարհային ներմուծման մոտավորապես 2,5 տոկոսին: Այդ մասին, ինչպես տեղեկացնում Է «Արմենպրես»-ը, ասված Է Տնտեսական համագործակցության եւ զարգացման կազմակերպության (ՏՀԶԿ) հաշվետվության մեջ: ՏՀԶԿ-ն նշում Է, որ անօրինական առեւտրից ամ ենից ավելի տուժում են ԱՄՆ-ի, Իտալիայի եւ Ֆրանսիայի բրենդները, տեղեկացնում Է «Արմենպրես»-ը:

Հաշվետվության մեջ հաշվի են առնվել ապրանքանիշերի, դիզայնի եւ պատենտների նկատմամբ ընկերությունների իրավունքները խախտող ապրանքները, ինչպես նաեւ հեղինակային իրավունքների խախտմամբ պատրաստված արտադրանքը: Ցանցահենությունը տեղ չի գտել հետազոտության մեջ:

Եվրամիություն ներմուծված բոլոր ապրանքների մոտավորապես 5 տոկոսը կեղծված Է, նշում են փորձագետները:

Իրավախախտներն ամենից ավելի շատ կեղծում են ԱՄՆ-ի բրենդների արտադրանքը. նման ապրանքանիշերով ապրանքների մինչեւ 20 տոկոսը կեղծամակնիշ Է: Դրանց հաջորդում են իտալական առեւտրանիշերը (15 տոկոս), ֆրանսիական եւ շվեյցարական (12-ական տոկոս), ճապոնական եւ գերմանական բրենդները (8-ական տոկոս):

Չինաստանում Է արտադրվում աշխարհում կեղծամակնիշ բոլոր ապրանքների 63,2 տոկոսը: Նրան մեծ տարբերությամբ հաջորդում են Թուրքիան (3,3 տոկոս), Սինգապուրը (1,9 տոկոս), Թաիլանդը (1,6 տոկոս) եւ Հնդկաստանը (1,2 տոկոս), հաղորդել Է «Ինտերֆաքս» գործակալությունը: