Toyota-ն երկրաշարժի պատճառով դադարեցնում Է իր գործարանների աշխատանքը Ճապոնիայում

Toyota Motor ավտոմոբիլաշինական կորպորացիան Կյուսյու հարավարևմտյան կղզում տեղի ունեցած մի շարք ուժգին երկրաշարժերի հետևանքով դետալների մատակարարման շղթայի խափանումների պատճառով սկսել Է դադարեցնել իր հավաքման գծերի աշխատանքը Ճապոնիայում: Ներկայումս, ինչպես տեղեկացնում Է «Արմենպրես»-ը, հինգ ձեռնարկություններ են կանգնեցվել Ֆուկուոկայի և Այիթիի պրեֆեկտուրաներում, որտեղ գտնվում Է կորպորացիայի կենտրոնակայանը:

Ընդամենը Toyota-ն պլանավորում Է Ճապոնիայի տարածքում կանգնեցնել 16 հավաքման գծերից 15-ը: Դրանք չեն աշխատի առնվազն մինչև ապրիլի 25-ը: Դետալների մատակարարման գործում տեղի ունեցած խախտումները հանգեցրել են նաև Միյագիի և Իվատեի պրեֆեկտուրաներում Daihatsu հավաքման ձեռնարկությունների փակման անհրաժեշտությանը:

«Նիկեյ» առաջատար գործարար թերթի տվյալներով՝ արտադրության կանգնեցումը կբերի 50 հազար ավտոմեքենայով Toyota-ի արտադրության ծավալների կրճատման:

Տարերքի հարվածի պատճառով Կյուսյու կղզում դադարեցվել Է ձեռնարկությունների մեծ մասի աշխատանքը: Դրանց թվում Է Toyota-ի հանգուցային մատարարարներից մեկը՝ Aisin Seiki ընկերությունը, որը Կումամոտոյի պրեֆեկտուրայի իր գործարանում թողարկում Է դռներ, շարժիչներ և ավտոմեքենաների մի քանի այլ դետալներ: Այստեղ չեն աշխատում նաև Sony, Honda Motor, Bridgestone, Mitsubishi Electric ձեռնարկությունները, հաղորդել Է ՏԱՍՍ-ը: