Ադրբեջանամետ Պուտինը

Պատկերացնո՞ւմ եք՝ Վլադիմիր Վլադիմիրովիչն անձամբ է զբաղվելու Արցախի հարցով: Այդ մասին ռուսական «Իզվեստիա» թերթն է գրել ու, եթե հավատանք թերթին, Վլադիմիրովիչն ամեն ինչ որոշել է ու որոշել է նաև մեր փոխարեն, թե ինչպես պետք է լուծի այդ հարցը: Բնական է, եթե մեր իշխանություններն այդքան թույլ են և հայ-ռուսական հարաբերությունների մեջ այդքան ցածր դիրք գրաված, ապա Վլադիմիրովիչը տեսականորեն կարող էր այդպիսի բան մտածել և նույնիսկ նման միտք արտահայտել: Ուղղակի մի բան հաշվի չի առել ՌԴ նախագահը, եթե նման միտք արտահայտել է. նա մոռացել է, որ հայկական կողմը, մասնավորապես Հայաստանի հասարակ քաղաքացիները չեն ընդունի ու չեն հանդուրժի իր առաջարկած ադրբեջանամետ տարբերակը:

Հիմա ասեմ, թե ինչու ադրբեջանամետ. այսինքն՝ այստեղ ասելու բան էլ չկա, որովհետև Պուտինն իր այս առաջարկով ակնհայտ ադրբեջանամետ դիրքորոշում ցուցաբերեց: Ըստ «Իզվեստիա» թերթի՝ ՌԴ նախագահը փաստացի ասել է, որ Արցախի հարցի լուծումը ինքը տեսնում է տարածքի մի մասն Ադրբեջանին վերադարձնելու, հակամարտության գոտում խաղաղապահներ մտցնելու, փախստականներին վերադարձնելու, ինչպես նաև Ղարաբաղի օրինականացման ճանապարհով, որից հետո արդեն, երբ կրքերը կհանդարտվեն, կանցկացվի հանրաքվե տարածաշրջանի պատկանելության մասին: Այսինքն՝ տեսեք՝ ինչ է ստացվում՝ մեզ իր վասալը համարող չակերտավոր «դաշնակիցը» մեր փոխարեն որոշում է զիջումներ անել, հող տալ Ադրբեջանին և նույնիսկ երաշխիք չի տալիս, որ Արցախն արդյունքում կլինի հայերինը: Ասում է՝ հանրաքվե կանցկացվի փախստականների վերադարձից հետո: Իսկ ո՞վ է կազմակերպելու այդ հանրաքվեն, Ռուսաստա՞նը: Բա ի՞նչ երաշխիք ունենանք, որ դրա արդյունքները Ռուսիո հարգարժան ղեկավարները «նկարել» չեն տա:

Էլ ադրբեջանամետությունն ինչպե՞ս է լինում, կասե՞ք...

Հետո էլ խոսում են հակառուսական հիստերիայի մասին, հայ-ռուսական հարաբերությունների մեջ սեպ խրելու մասին: Այո, շատ վատ է, որ սեպ է խրվում հայ-ռուսական հարաբերությունների մեջ, ես ինքս դեմ եմ այդ սեպը խրելուն, բայց այսօր այդ սեպը խրողը, ցավոք, Արևմուտքը չէ, այլ հենց ՌԴ ղեկավարները՝ իրենց հակահայկական բնույթի քայլերով: Պուտին, Մեդվեդև, Ռոգոզին՝ ահա հայ-ռուսական հարաբերությունների մեջ սեպ խրողները:

Հուսամ՝ եթե այս լուրը պաշտոնապես հաստատվեց, մեր իշխանությունները չեն վախենա կոշտ դիրքորոշում հայտնելուց, հակառակ դեպքում ժողովրդի կողմից աջակցություն ակնկալելը, կարծում եմ, նրանց համար կդառնա անիրատեսական:

Կարեն Վարդանյան