Մամուլի ազատության ինդեքսում Հայաստանը 4 հորիզոնականով առաջընթաց է գրանցել. Ադրբեջանը վերջին 20 երկրի թվում է

Մամուլի ազատության վերաբերյալ վարկանիշային աղյուսակում 180 երկրների մեջ Ադրբեջանը վերջին 20 երկրների թվում է՝ զբաղեցնելով 163-րդ տեղը:

Ինչպես հաղորդում է «Արմենպրես»-ը, «Լրագրողներհն առանց սահմանների» միջազգային կազմակերպության կողմից պատրաստված 2016 թվականի Մամուլի ազատության ինդեքսում Ադրբեջանը նշվում է մամուլի ազատության մակարդակով առավել խնդիրներ ունեցող 18 երկրների շարքում (նախորդ տարվա 162-ի փոխարեն, Ինդեքսում զբաղեցրել է 163-րդ տեղը):

«Վարկանիշն անդրադարձնում է լրագրողական ազատության վրա գրոհների ինտենսիվությունը և նրանց անկախությունը կառավարություններից, գաղափարախոսությունից և մասնավոր հատվածի շահերից»,- ասվում է «Լրագրողներն առանց սահմանների» կազմակերպության մամուլի տեղեկագրում (medusa.io):

Վարկանիշի վերջին երեք տեղերն անփոփոխ զբաղեցնում են Թուրքմենստանը, Հյուսիսային Կորեան և Էրիթրեան, որոնց «Լրագրողներն առանց սահմաններին» անվանում է «դժոխային եռյակ»:

Վարկանիշում, նախորդ տարվա համեմատ, Հայաստանը 4 հորիզոնականով առաջընթաց է գրանցել՝ զբաղեցնելով 74-րդ տեղը:

Մամուլի ազատության ցուցանիշով Հայաստանն առաջ է անցել այնպիսի երկրներից, ինչպիսիք են Իսրայելը (101-րդ տեղ), ինչպես նաեւ Եվրամիության անդամ Իտալիան (77-րդ տեղ), Հունաստանը (89-րդ տեղ) և Կիպրոսը (81-րդ տեղ):

Վարկանիշում Թուրքիան զբաղեցրել է 151-րդ տեղը, Ռուսաստանը՝ 148-րդ տեղը, Իրանը՝ 169-րդ տեղը:

Ամենազատ երկրների հնգյակում են Ֆինլանդիան, Նիդերլանդները, Նորվեգիան, Դանիան, և Նոր Զելանդիան:

Զեկույցում նշվում է, որ ընդհանուր առմամբ, աշխարհում ուժեղացել են իշխանությունների և մասնավոր բիզնեսի կողմից լրագրողների նկատմամբ ճնշումները: