Հայկական ջարդերի մասին գրքի հեղինակ Այլիսլին կարող է երեք տարի ժամկետով ազատազրկման դատապարտվել Ադրբեջանում

Ադրբեջանում հայկական ջարդերի մասին «Քարե երազներ» գրքի հեղինակ Աքրամ Այլիսլիի նկատմամբ քրեական գործով հետաքննությունը շարունակելու համար այն ուղարկվել է Բաքվի դատախազություն:

Այս մասին, ինչպես հաղորդում է «Արմենպրես»-ը' վկայակոչելով Meydan TV կայքը, Facebook-ի իր էջում գրառել է Այլիսլիի փաստաբան Էլչին Սադըգովը' նշելով, որ 79-ամյա ադրբեջանցի գրողին մինչև երեք տարի ժամկետով ազատազրկում է սպառնում:

«Ապրիլի 21-ին Աքրամ Այլիսլիի հետ միասին եղանք Օդային տրանսպորտի ոստիկանական վարչության քննչական բաժնում: Մեզ տեղեկացրեցին, որ Աքրամ Այլիսլիի նկատմամբ «իշխանության ներկայացուցչի դեմ բռնություն գործադրելու» հոդվածով քրեական գործ է հարուցվել, որով նրան մինչև երեք տարի ազատազրկում է սպառնում», -նշել է փաստաբանը:

Էլչին Սադըգովը հավելել է, որ քրեական գործով հետաքննությունը շարունակելու համար այն ուղարկվել է Բաքվի գլխավոր դատախազություն:

Մեղադրական ակտում ասվում է, որ մարտի 30-ին Բաքվի միջազգային օդանավակայանում Աքրամ Այլիսլին խախտել է հասարակության մեջ վարքի կանոնները, վիրավորել և հարվածել է Պետմաքսատան 35-ամյա աշխատակից Նիհալ Սեիդովին: Հարվածի արդյունքում մաքսավորի մարմնի վրա կապտուկ է առաջացել:

Աքրամ Այլիսլին որդու ուղեկցությամբ մեկնում էր Վենետիկ' մարտի 30-ից ապրիլի 1-ն անցկացվելիք Incroci Di Civilita միջազգային գրական փառատոնին մասնակցելու համար, որտեղ նա պետք է ելույթ ունենար «Գրողը և իշխանությունը» թեմայով:

Այլիսլին մեղադրանքի հետ չի համաձայնվել: Նա պնդում է, որ չի հայհոյել և չի հարվածել ոչ մեկի: Նա ասել է, որ իր տարիքը և հասարակական դիրքը թույլ չի տալիս նման ֆիզիկական և բարոյական վարքագիծ դրսևորել:

Աքրամ Այլիսլին հայտարարել է, որ Ադրբեջանում իրեն հետապնդում են որպես գրողի գործունեության համար:

Աքրամ Այլիսլին մարտի 30-ին բերման էր ենթարկվել Բաքվի միջազգային օդանավակայանի տրանսպորտի ոստիկանություն, որտեղ նրան 15 ժամ պահելուց հետո բաց էին թողել' հայտարարելով, որ արգելվում է նրա ելքը երկրից:

Ադրբեջանում իշխանությունների կողմից Աքրամ Այլիսլիի հետապնդումները սկսվել են 2013 թվականին «Քարե երազներ» վեպի հրատարակումից հետո, որտեղ նա փաստագրական նյութերի հիման վրա մանրամասն նկարագրել է անցյալ դարասկզբին Նախիջևանի Ագուլիս բնակավայրում և 1990-ականներին Ադրբեջանում հայերի նկատմամբ ադրբեջանցիների վայրագությունները և ջարդերը: Ադրբեջանի իշխանություններին հատկապես զայրացրել է այն, որ Այլիսլին իր վեպում ակնարկել է Բաքվի հայկական ջարդերը Ադրբեջանի համազգային առաջնորդ Հեյդար Ալիևի կողմից կազմակերպված լինելու մասին: