Սիրիայի խորհրդարանական ընտրություններում հաղթել է «Ազգային միասնություն» դաշինքը

Անցած կիրակի ամփոփվեցին Սիրիայում ապրիլի 13-ին կայացած խորհրդարանական ընտրությունների արդյունքները: Այդ առնչությամբ է ԼՈՒՐԵՐ.com-ի հարցազրույցը ՀՀ ԳԱԱ արևելագիտության ինստիտուտի գիտաշխատող, ԵՊՀ դոցենտ, արաբագետ Արաքս Փաշայանի հետ:

- Ունե՞ք արդեն տեղեկություններ, թե Սիրիայի խորհրդարանական ընտրությունների արդյունքում պատգամավորական մանդատ ստացածների ուժերի ինչ հարաբերակցություն է գրանցվել: Մասնավորապես նկատի ունեմ իշխանական և ընդդիմադիր ուժերի կողմից ընտրված պատգամավորներին:

- Ճիշտն ասած, այս դեպքում ընդդիմադիրն ու իշխանականը մի քիչ հարաբերական հասկացություններ են: Ձայների 80 տոկոսը տրված են «Բաաս» իշխող կուսակցությանն ու նրա դաշնակիցներին, նրանք հանդես են եկել «Ազգային միասնություն» դաշինքով, այսինքն' 250 տեղերից 200-ն իրենցն է: Մնացած 50 տեղը վերցրել են ոչ կուսակցականները և դաշինքի պես երկու կազմակերպություններ, որոնք ինձ անծանոթ են, մեկը կոչվում է «Ազգային առաջադիմական ճակատ», մյուսը' «Փոփոխությունների և ազատությունների ժողովրդական ճակատ»: Ենթադրում եմ, որ այդ կազմակերպությունները Սիրիայի չափավոր ընդդիմությունն են:

- Հայ պատգամավորներն իշխող կուսակցության ցուցակո՞վ են ընտրվել, թե չափավոր ընդդիմությունը ներկայացնող կազմակերպությունների:

- Նրանք մնացած 50-ի մեջ են, տեղյակ եմ, որ դոկտոր Նորա Արիսյանն անկուսակցական է, իսկ պատգամավոր ընտրված Բերիո թեմի առաջնորդարանի խոսնակ Ժիրայր Ռեիսյանի կուսակցական պատկանելության կամ քաղաքական կողմնորոշման մասին դեռ տեղեկություն չունեմ:

- Արմատական ընդդիմությունը, ռազմաքաղաքական խմբավորումներն ընտրություններին չե՞ն մասնակցել:

- Ոչ, նրանք բոյկոտել էին ընտրությունները: Բոյկոտել էին նաև քրդական կուսակցությունները և քաղաքական ուժերը: Ընդհանուր առմամբ, Սիրիայում կայացած ընտրությունների արդյունքները Միացյալ Նահանգների, Մեծ Բրիտանիայի, Գերմանիայի, Ֆրանսիայի և այլ պետությունների կողմից չեն ճանաչվել, համարվում են ոչ լեգիտիմ: Ընտրությունների արդյունքները ճանաչել են Ռուսաստանը, Իրանը, Չինաստանի առնչությամբ դեռ տեղեկություն չունեմ:

Հարցազրույցը' Արթուր Հովհաննիսյանի