Դերասան Թոմ Հենքսը հավատում է «Լեսթեր»-ի չեմպիոնությանը

Աշխարհահռչակ օսկարակիր դերասան Թոմ Հենքսը, ով թեև ֆուտբոլային գիտակ չէ, սակայն մշտապես սիրում է խոսել ֆուտբոլի մասին, հայտնել է, որ դեռևս Անգլիայի «Պրեմիեր լիգա»-ի ընթացիկ առաջնության մեկնարկից առաջ ինքը 100 ֆունտ ստեռլինգի խաղադրույք է կատարել «Լեսթեր»-ի չեմպիոնության վրա: «Արմենպրես»-ը, վկայակոչելով «The Guardian»-ին, հայտնում է, որ հոլիվուդյան աստղը վստահ է, որ իր խաղադրույքն իրականություն է դառնալու. «Լեսթեր»-ը նվաճելու է չեմպիոնություն:

«Իսկ դուք գիտե՞ք, թե ինչ եմ արել Անգլիայի ընթացիկ առաջնությունից առաջ: Ես 100 ֆունտ եմ դրել «Լեսթեր»-ի չեմպիոն դառնալու վրա: Իրոք նման բան եմ արել եմ, թե չեմ արել, իմ գործն է: Չե՞ք հավատում ինձ: Դա ձեր իրավունքն է, բայց կարծում եմ ճիշտ եմ վարվել: Հիմա պետք է փնտրել մի մարդու, ով այդ թիմի վրա 25 հազարի խաղադրույք է կատարել, չէ՞ որ նա միլիոններ է հաղթելու»,- կեսկատակ-կեսլուրջ ասել է անվանի դերասանը «A Hologram for the King» ֆիլմի պրեմիերայից առաջ ունեցած կարճ զրույցի ընթացքում:

«Պրեմիեր լիգա»-ի նախորդ առաջնության հետնապահներից մեկը՝ «Լեսթեր»-ը, 2015/2016 թթ. մրցաշրջանից առաջ ամենևին էլ չէր դիտարկվում որպես չեմպիոնության հիմնական հավակնորդ: Բրիտանական բուքմեյքերները «Լեսթեր»-ի' չեմպիոնական տիտղոսը նվաճելու համար մոտ 5000 գործակից էին սահմանել: Հետևաբար եթե Թոմ Հենքսը չի կատակում, ապա հաշված օրեր անց կարող է շահել 500,000 ֆունտ ստեռլինգ: