Բրյուսելի օդանավակայանը մայիսի սկզբին մասնակիորեն կբացի մեկնաթռիչքների ավերված սրահը

Բրյուսելի միջազգային օդանավակայանը մեկնող չվերթերի օրական թողունակությունն ավելացրել է մինչև 18 հազար ուղևոր և ծրագրում է մայիսի սկզբին մասնակիորեն բացել մեկնաթռիչքների սրահը, որն ավերվել էր մարտի 22-ի ահաբեկչական գործողությունից: Այդ մասին, ինչպես տեղեկացնում է «Արմենպրես»-ը, ասված է օդանավակայանի հայտարարության մեջ:

Դրանում նշվում է, որ օդանավակայանն սկսել է «մեկնաթռիչքների սրահի ժամանակավոր բացման տեխնիկական նախապատրաստման վերջին փուլը»:

«Առայժմ հայտնի չէ, թե որքան ժամանակ կպահանջեն այդ նախապատրաստումը և նորոգումը: Օդանավակայանը ծրագրում է մասնակի բացում մայիսի սկզբին՝ անվտանգության ծառայությունների հետ խորհրդակցելուց հետո»,- ասված է պաշտոնական հաղորդագրության մեջ:

Մարտի 22-ի առավոտյան երկու պայթյուն է որոտացել Բրյուսելի միջազգային օդանավակայանում: Երրորդ պայթյունը տեղի է ունեցել փոքր-ինչ ավելի ուշ մետրոյի «Մալբեկ» կայարանում՝ գնացքի վագոնում: Ահաբեկչական գործողությունների հետևանքով զոհվել է 32 մարդ, ավելի քան 300-ն ստացել է տարբեր աստիճանի ծանրության վերքեր: Գրոհի պատասխանատվությունն ստանձնել է «Իսլամական պետություն» ահաբեկչական խմբավորումը, հաղորդել է ՌԻԱ Նովոստին: