Թուրքիայում հայտնաբերել են հակահայկական տեսահոլովակ նկարահանած անձին

Թուրքիայի ներքին գործերի նախարարի տեղակալ Սեբահաթթին Օզթյուրքը նշել է, որ Դիարբեքիրի Սուր գավառում նկարահանված և երեքշաբթի օրը սոցցանցերում տարածված տեսահոլովակում նկարահանվածը անվտանգության աշխատակից է։  Թուրք պաշտոնյան նշել է, թե պարզել են նրա ինքնությունը. անվտանգության աշխատող է, որն արդեն ազատվել է աշխատանքից, տեղեկացնում է «Ակօսը»:

2015 թվականի դեկտեմբերի 2-ից Սուրի այդ թաղամասում, որտեղ նկարահանվել է տեսահոլովակը, պարետային ժամ է հայտարարված, և փողոց դուրս գալն արգելվում է։

Քրդամետ «Ժողովուրդների դեմոկրատիա» կուսակցության պատգամավոր Նադիր Յըլդըրըմը դիմել էր Թուրքիայի ՆԳ նախարարին՝ նշելով, որ տեսանյութում հնչող խոսքերն ատելություն, սպառնալիքներ ու ռասիստական հայտարարություններ են պարունակում։

Երեկ ՆԳ փոխնախարարը զանգահարել է ԺԴԿ-ական պատգամավոր, ազգությամբ հայ Կարո Փայլանին և տեղեկացրել, որ այդ անձն ազատվել է աշխատանքից։

Ի դեպ, տեսահոլովակը նկարահանվել է Դիարբեքիրի այն թաղամասում, որտեղ գտնվում է հայկական Սուրբ Կիրակոս եկեղեցին։ Դրանում երևում է, թե բախումների հետևանքով ինչ վիճակում է հայտնվել շրջանը։

«Ակօս»-ը գրում է, որ տեսահոլովակում երևում է, թե ինչպես են շրջանի առնվազն երկու թաղամասերն ավերակների վերածվել։ Ենթադրվում է, որ տեսահոլովակը պրոֆեսիոնալ թիմ է նկարել՝ մի քանի մարդուց բաղկացած։