ՀԱԿ–ի պարագայում ամեն ինչ հասկանալի է. Արամ Կարապետյան

«ՀԱԿ–ի պարագայում ամեն ինչ հասկանալի է. իրենք չորս տարվա իրենց տարած պայքարի ընթացքում ամենացածր վարկանիշի ժամանակ մտան  ընտրությունների փուլ, քանի որ չորս տարվա ընթացքում ունեցել են վայրիվերումներ»։ Այս կարծիքը ՀԱԿ հավաքած ձայների մասին հայտնեց «Նոր Ժամանակներ» կուսակցության նախագահ Արամ Կարապետյանը։

Նրա կարծիքով, ՀԱԿ–ի հիմնական խնդիրը Լևոն Տեր–Պետրոսյանի ինտրիգային դաշտում գործելու սերն է, ինչը ըստ նրա, ցույց է տվել փորձը։ 

Բանախոսը, անդրադառնալով ապագա կառավարության հնարավոր կազմին, նշեց, որ իր համոզմամբ այն էական փոփոխությունների չի ենթարկվի  իրականացրած կուրսի առումով։ 

Ինչ վերաբերում է Կարապետյանի բազմիցս արված հայտարարություններին, թե ընտրությունների կեղծման պարագայում իրենց կուսակցությունը սպասելու ընդդիմադիր ուժերին փողոցում, նա հաստատեց իր պատրաստակամությունը և նշեց, որ իրենք իրենց ունեցած բոլոր ռեսուրսներով մասնակցելու են փողոցային պայքարին։ 

Նրա համոզմամբ, եթե ԲՀԿ–ն ու ՀՅԴ գան հրապարակ և կմիանան փողոցային պայքարին՝ պայքարը կթեժանա, իսկ եթե չգան՝ շատ արագ կմարի։

Անդրադառնալով «Բարգավաճ Հայաստան» կուսակցությանը՝ Կարապետյանը կարծիք հայտնեց, որ եթե հիմա ԲՀԿ–ն շարունակի կոալիցիա կազմելու իր գործողությունները, «այսինքն՝ իսկապես գնա նրան, որ կոալիցի ստեղծի ՀՀԿ–ի հետ», ապա դա ցույց կտա, որ գործընթացի ծրագրավորողները շատ խելացի են վարվել։ «Մտադիր էին Բարգավաճին բերել ընդդիմության դաշտ, քաշել իրենց վրա ՀԱԿ–ի թվերը։ Ձայները գնացին իրենց, և ՀԱԿ–ին թուլացնելով՝ արմատական ընդդիմությանը թուլացնելով, գնացին կոալիցիա կազմելու», – իր կանխատեսումը եզրափակեց Կարապետյանը՝ հավելելով, որ ԲՀԿ–ի պարագայում պետք է սպասել մինչև սեպտեմբեր։