Դեր-Զոր՝ գազելներով. Նիկոլ Փաշինյանի ելույթը ՀԱԿ հանրահավաքում

Սիրելի ժողովուրդ։

ՀՀ հպարտ քաղաքացիներ։

Վերջին տարիներին տարբեր ամբիոններից ու հեղինակավոր անձանց կողմից հնչած գնահատականը, թե սերժանտական իշխանությունը Հայաստանում իրականացնում է սպիտակ ցեղասպանություն, ևս մի անգամ հիմնավորվեց։ Միավորված ազգերի կազմակերպության բանաձևերում ցեղասպանության երևույթի մի քանի ձևակերպումներ կան. դրանցից մեկի համաձայն՝ ցեղասպանություն է համարվում խմբի համար այնպիսի կենսապայմանների ստեղծումը, որի նպատակը այդ խմբի լիովին կամ մասնակի ֆիզիկական ոչնչացնումն է: Սերժ Սարգսյանը և նրա ղեկավարած հանցավոր խմբավորումն ըստ էության հենց սա են իրականացնում Հայաստանում և մարդկանց այն խումբը, որոնց ուզում է ոչնչացնել սերժանտական հանցախումբը, ՀՀ քաղաքացիներն են, այն քաղաքացիները, որին սահմադրությամբ վերապահված է բարձրագույն իշխանության դերակատարում:

Եվ մայիսի 6-ի ընտրություններում ՀՀ քաղաքացիների ցեղասպանության մասին պնդումը կոնկրետ ապացույց ստացավ: Մտեք ամեն բակ, ամեն տուն, ամեն ընտանիք և կտեսնեք, որ մարդիկ իրենց ներսում համատարած զզվանք, ատելություն են տածում Սերժ Սարգսյանի իշխանության նկատմամբ, բայց ընտրությունների արդյունքում Հայաստանի համար միայն ու միայն ձախողումներ իրականացրած այդ իշխանությունը ստանում է ավելի մեծ խորհրդարանական մեծամասնություն, քան ուներ նախկինում: Ի՞նչ է սա նշանակում։ Ընդամենը մեկ բան՝ մարդիկ Հայաստանում ընտրություն կատարում են ոչ թե սեփական ընկալումների, զգացումների, գիտակցության ու վերլուծության արդյունքում, այլ վարչական, ուժային ֆինանսական թելադրանքի ներքո: Սերժ Սարգսյանի իշխանությունը մարդու մեջ սպանում, ոչնչացնում է քաղաքացուն և այդ երևույթը, որ այստեղ տեղի է ունենում, Հայաստանում միանշանակ և աներկբա կարելի է անվանել քաղաքացիական ցեղասպանություն:

Սերժանտական իշխանությունը հետևողականորեն աշխատում է Հայաստանի քաղաքացու ինստիտուտը ոչնչացնելու, քաղաքացուն հնազանդ, հպատակ դարձնելու ուղղությամբ և պետք է խոստովանել, որ այս հարցում ունի տպավորիչ հաջողություններ: Մայիսի 6-ի օրը Երևանում շրջելիս՝ սկսեցի մտածել, որ եթե 20-րդ դարասկզբին Նիժնի Նովգորոդի ավտոմոբիլաշինական գործարանը արտադրելիս լիներ գազել միկրոավտոբուսներ, երիտթուրքերը հայոց ցեղասպանության զոհերին Դեր-Զոր կքշեին գազելներով: Ընտրական տեղամասերը մերօրյա Դեր-Զոր են դարձել քաղաքացու համար, ընտրությունների օրը՝ մի նորօրինակ ապրիլի 24, և եթե մինչև մայիսի վեցը խոսում էի լֆիկական «օսվենցիմի» մասին, արդեն կարող ենք արձանագրել, որ Հայաստանն է վերածվում քոչարյանաշերժանտական «օսվենցիմի» և դրա ազատագրումը շարունակում է մնալ մեր ամենահրատապ քաղաքական խնդիրը:

Սիրելի ժողովուրդ, ՀՀ հպարտ քաղաքացիներ։

Այնուամնենայնիվ, մենք այսօր այստեղ չենք հավաքվել քաղաքացիական պայքարի թեմայով ողբ անելու: Երևանի թիվ 7 ընտրատարածքում աշխատող իմ թիմի ներկայացուցիչները մայիսի յոթի լուսաբացին ընտրական տեղամասերը լքել են հպարտության զգացումով, որովհետև լֆիկական օսվենցիմում գտնվել է 9099 Քաղաքացի, ովքեր քվերակել են իմ օգտին: Նրանք կռիվ են տվել լֆիկական գետտոյում ու հասկանալու համար, թե ինչ է դա նշանակում, դուք պետք է տեսնեիք օսվենցիմի կատարածուների դեմքերը՝ ընտրական տեղամասերում քվեաթերթիկները հաշվելիս: ՀՀ-ում գտնվել է 106,000 քաղաքացի, որ քվերակել է ՀԱԿ-ի օգտին։ Այդ մարդիկ այն բեմն են, որի վրա կառուցվելու է ազատ Հայաստանը, այդ մարդիկ, այդ քաղաքացիներն են, որ ազատագրելու են Հայաստանը: Մենք ազատագրելու ենք քոչարյանասերժանտական օսվենցիմում գերեվարված մեր եղբայրներին ու քույրերին, նրանց հավատ ու հպարտություն ենք ներշնչելու:

ՀԱԿ-ի խմբակցությունը, այո՛, պետք է գնա խորհրդարան և խորհրդարանական պայքար մղի, ամենօրյա պայքար քաղաքական իրավիճակի փոփոխության համար: Հեղափոխությունը, քաղաքացիական հեղափոխությունը, որ շարունակում է մնալ մեր հիմնական նպատակը, նոր եռանդ, նոր ավյուն, նոր մոտեցումներ ու հարթակների կարիք ունի և խորհրդարանական հնարավորությունները պետք է ծառայեցվեն հեղափոխության նպատակներին: ՀԱԿ-ի խմբակցությունը պետք է աշխատի խորհրդարանում, պետք է ՀՀ քաղաքացիների ու Հայաստանի սահմանադրությանը պաշտպանի խորհրդարանում և պետք է դառնա ոգեշնչման այն աղբյուրը, որը ՀՀ հարյուր հազարավոր քաղաքացիների դուրս կբերի ազատության հրապարակ, և սերժանտական իշխանության նորօրյա ապրիլի 24-ները մի ինչ որ պահի մենք պետք է վերածենք նորօրյան մայիսի 8-երի և պետք է հաղթանակի քոչարի պարենք սերժանտական ռայխսթագի՝ Բաղրամյան 26-ի պատերի տակ:

Ես ինքս՝ Նիկոլ Փաշինյանս, ընդունելու եմ ՀՀ ազատասեր քաղաքացիների, ՀԱԿ-ի առաջնորդ Լևոն Տեր-Պետրոսյանի կողմից ինձ տրված պատգամավորական մանդատը և ՀՀ խորհրդարանում իմ գործունեությունը վերածելու եմ կոնկրետ քաղաքական արդյունքի, կոնկրետ ազատության, հպարտության, կոնկրետ հավատի: