Ադրբեջանում համառորեն շրջանավառվում է ԶՈւ ԳՇ ղեկավարի պաշտոնանկությունը

Ադրբեջանում մայիսի 10-ից համառորեն շրջանառվում է զինված ուժերի գլխավոր շտաբի պետ Նեջմեդդին Սադըգովի պաշտոնանկության մասին լուրը: Ընդդիմադիր կայքերը հայտնում են, որ Ադրբեջանի ԶՈւ ԳՇ ղեկավարը պաշտոնանկ է արվել ապրիլի սկզբին Լեռնային Ղարաբաղի դեմ ռազմական գործողություններում «թույլ տված մարտավարական սխալների» պատճառով: Ադրբեջանի պաշտպանության նախարարության մամուլի ծառայությունը հերքել է լուրը՝ անվանելով այն «զրպարտություն»:

Ինչպես հաղորդում է «Արմենպրես»-ը, այդ առնչությամբ dia.az լրատվական կայքը Նեջմեդդին Սադըգովի հետ կապված հետաքրքիր փաստեր է բացահայտել:

Կայքը գրում է, որ Ռուսաստանի Դաշնության Դաղստանի Դերբենդ քաղաքի փողոցներից մեկը հանդիսավոր արարողությամբ անվանակոչվել է Նեջմեդդին Սադըգովի անունով, ինչին մասնակցել է նաև Ադրբեջանի ՊՆ գեներալը:

Ադրբեջանական ԶԼՄ-ներն ավելի վաղ հայտնել էին, որ Նեջմեդդին Սադըգովը հայտարարվել է նաև Դաղստանի ազգային հերոս: Դերբենդում այն դպրոցի դիմաց, որտեղ նա սովորել է, տեղադրվել է նրա կիսանդրին:

Կայքը տարակուսանք է հայտնում, թե այդ ինչ՞ պատճառով և չափանիշներով է Ադրբեջանի ԶՈւ ԳՇ ղեկավարը արժանացել նման պատվի Դաղստանում, երբ Նեջմեդդին Սադըգովը Դաղստանի հետ կապված ծառայություն և գործունեություն չի ունեցել:

«Այդ ինչպե՞ս է, որ Դաղստանում բողոքի ակցիաներ են ընթանում Հեյդար Ալիևի անվամբ փողոցն անվանափոխելու պահանջով, իսկ Նեջմեդդին Սադըգովի անունն օրեցօր հավերժացվում է: Եթե դա կապված է ռազմական համագործակցության հետ, ապա ինչո՞ւ Ադրբեջանի գերագույն գլխավոր հրամանատարի անունով Դաղստանում որեւէ օբյեկտ, անգամ ցուցատախտակ չկա, իսկ գլխավոր շտաբի ղեկավարի անունով՝ ամեն ինչ կա»,- գրում է կայքը: