Արցախի պատասխանը Ջեյմս Ուորլիքին՝ վերադարձ անցյալին չկա

ԼՈՒՐԵՐ.com-ի զրուցակիցն է Արցախի նախագահ Բակո Սահակյանի մամուլի խոսնակ Դավիթ Բաբայանը:

- Պարոն Բաբայան, ԵԱՀԿ Մինսկի խմբի ամերիկացի համանախագահ Ջեյմս Ուորլիքը թերթերից մեկին տված հարցազրույցում, խոսելով Ղարաբաղյան հակամարտության համակողմանի լուծման մասին, նշել է, որ «համակողմանի լուծումը կներառի Լեռնային Ղարաբաղի վերջնական կարգավիճակի որոշումը ու հարակից տարածքների վերահսկողությունն Ադրբեջանին վերադարձնելը»: Այսինքն՝ կրկին խոսվում է տարածքներ զիջելու մասին:

- Եթե անգամ նա ինչ-որ գաղափարներ է առաջ քաշում, պետք է հասկանալ, որ բանակցային գործընթացները չեն կարող լինել միակողմանի: Ոչ թե կարգավորումը, այլ գաղափարների ներառումը: Կարգավորումը կողմերի առաջարկների փաթեթավորումն է, հետո քնարկումը: Հիմա ո՞նց եք դուք պատկերացնում. եթե Ադրբեջանը տարածքներ է ուզում, էդ հարցը չդնե՞ն քննարկման մեջ: Ոչ, պետք է դնել: Մենք էլ ասում ենք՝ վերադարձ անցյալին չկա: Դրանք պետք է քննարկվեն, որևէ պարտադրանք չի կարող լինել: Դրա մասին ասել են բոլոր համանախագահները և երկրների ղեկավարները: Իրենք դատավորներ չեն, իրենք միջնորդներ են, առաջարկում են գաղափարներ: Այս 4 օրվա պատերազմը ևս մեկ անգամ ապացուցեց, որ մենք իրավացի ենք:

- Ուորլիքը նաև ասում է՝ «եթե ուզում ենք առաջընթաց ունենալ խաղաղության հարցում, անհրաժեշտ է, որ երկու ուղղությամբ էլ աշխատանքներն ընթանան առանց նախապայմանների»: Առանց նախապայմանների հնարավո՞ր է:

- Առանց բանակցային գործընթացի վերսկսման՝ պետք է կատարել քայլեր, որպեսզի տարածաշրջանում լինի խաղաղություն և կայունություն: Մենք պետք է սկսենք ստորին օղակից, առանց որի հնարավոր չի լինելու անցնել առաջ:

- Մինսկի խմբի համանախագահներն ինչո՞ւ չեն դատապարտում ապրիլի 2-ին Ադրբեջանի սանձարձակ ու նախահարձակ գործողությունները:

- Սա մի ոճ է, որը որդեգրել է Մինսկի խումբը՝ որպես միջնորդ կազմակերպություն, երևի իրավիճակն է՛լ ավելի չբարդացնելու համար: Բայց մենք ասել ենք, որ անհրաժեշտ է ավելի հասցեական և կոշտ դիրքորոշում ցուցաբերել այն կողմի նկատմամբ, որը խախտում է զինադադարի ռեժիմը: Եթե դա տեղի չի ունենում, նշանակում է՝ Ադրբեջանն է՛լ ավելի է գոտեպնդվում և շարունակում իր ագրեսիվ գործողությունները: Բայց Մինսկի խումբը հստակ մեսիջներ է ուղարկել, որ պատերազմն անընդունելի է: Մենք չենք կարող դա անտեսել:

Քրիստինա Աղալարյան