Ռուսեֆը ժամանակավոր պաշտոնազրկումից հետո արձակեց Բրազիլիայի կառավարությունը

Բրազիլիայի նախագահ Դիլմա Ռուսեֆը հայտարարել է իր կառավարության արձակման մասին այն բանից հետո, երբ համերկրային Սենատը (խորհրդարանի վերին պալատ) քվեարկեց նրա նկատմամբ իմպիչմենթի ընթացակարգը շարունակելու օգտին: Իշխանությունից ժամանակավորապես հեռացված պետության ղեկավարի համապատասխան դեկրետը հրապարակել է հարավամերիկյան հանրապետության Պաշտոնական թերթը, տեղեկացնում է «Արմենպրես»-ը:

Ռուսեֆի դեկրետին համապատասխան, պաշտոնաթող են արվել բոլոր այն նախարարները, որոնք մտնում էին կառավարության կազմի մեջ, ինչպես նաև նախագահի խորհրդականները: Կաբինետի նոր կազմը պետք է ձևավորի Բրազիլիայի փոխնախագահ Միշել Տեմերը, որը պետութան ղեկավարի պարտականությունները կատարելու է իմպիչմենթի գործընթացի ժամանակաշրջանում:

Ինչպես արդեն հաղորդվել է, Բրազիլիայի Սենատը մայիսի 12-ին պաշտպանել է երկրի նախագահ Դիլմա Ռուսեֆին պաշտոնազրկելու ընթացակարգի շարունակումը: Որոշմանը կողմ է քվեարկել 55 սենատոր, դեմ՝ 22-ը: Դա նշանակում է, որ պետության ղեկավարը պետք է իր պաշտոնը թողնի 180 օրով. այդ ժամանակաշրջանում նրա պարտականությունները կատարելու է փոխնախագահ Միշել Տեմերը:

180 օրը չգերազանցող ժամանակաշրջանում սենատորները պետք է ուսումնասիրեն այն մեղադրանքները, որոնք Ռուսեֆին առաջադրվել են պաշտոնազրկման գործընթացի նախաձեռնողների կողմից: Եթե արդյունքում վերին պալատի անդամները չհամաձայնեն այդ փաստարկներին, նախագահը կվերադառնա իր պարտականությունների կատարմանը:

Հակառակ դեպքում Տեմերը պետության ղեկավարի պաշտոնում կմնա մինչև 2018 թվականի ընտրությունները: Ռուսեֆին պաշտոնից վերջնականապես հեռացնելու համար անհրաժեշտ է, որ այդ նախաձեռնությունը պաշտպանի սենատորների առնվազն երկու երրորդը, հաղորդել է ՏԱՍՍ-ը: