Իվետա Մուկուչյանը հաղթել է «Եվրատեսիլ-2016»-ի թոփ մոդելի քվեարկությունում

«Եվրատեսիլ-2016» երգի մրցույթում Հայաստանը ներկայացնող Իվետա Մուկուչյանը ճանաչվել է որպես այս տարվա թոփ մոդել: Հայ երգչուհին հաղթել է Wiwibloggs կայքի հայտարարած ամենամյա Eurovision's Next Top Model մրցույթում, որը քվեարկություններ է կազմակերպում՝ պարզելու ամենագեղեցիկ երգչուհուն և երգչին:

Wiwibloggs կայքում ապրիլից սկսված քվեարկությունը մայիսի 12-ին դադարեցվել է: Ըստ կայքում հրապարակած տվյալների' Իվետա Մուկուչյանը ստացել ձայների գերակշիռ մեծամասնությունը' 31,45 տոկոս կամ 16 հազար 266 ձայն:

Հայաստանյան պատվիրակին հաջորդում են «Եվրատեսիլ-2016»-ում Ադրբեջանը (22.71%) և Բուլղարիան (6.95%) ներկայացնող երգչուհիները:

«Եվրատեսիլ- 2016» մրցույթի այս տարվա կարգախոսն է Come together (Միավորվենք): Մրցույթում Հայաստանը ներկայացնում է երգչուհի Իվետա Մուկուչյանը LoveWave («Սիրո ալիք») ստեղծագործությամբ: Հայաստանի պատվիրակը, մայիսի 10-ին փայլուն ելույթ ունենալով առաջին կիսաեզրափակիչում, անցել է եզրափակիչ փուլ, որը կկայանա մայիսի 14-ին: Իվետան հանդես կգա վերջինը' 26 համարի ներքո: