Կազանում Հայ-ռուսական միջխորհրդարանական հանձնաժողովի նիստի աշխատանքներն ավարտվել են

Կազանում հունիսի 3-ին ավարտեց աշխատանքները Հայաստանի Հանրապետության Ազգային ժողովի և Ռուսաստանի Դաշնության Դաշնային ժողովի միջև համագործակցության Միջխորհրդարանական հանձնաժողովի 27-րդ նիստը:

Նիստի շրջանակներում Հայ-ռուսական Միջխորհրդարանական հանձնաժողովի համանախագահներ, ՀՀ ԱԺ փոխնախագահ Հերմինե Նաղդալյանն ու Նիկոլայ Ռիժկովը հանդիպել են Թաթարստանի Պետական խորհրդի նախագահ Ֆարիդ Մուխամեդշինի հետ: Հանդիպման ընթացքում երկուստեք կարևորվել է միջպետական, ինչպես նաև, տարածաշրջանային մակարդակով երկու երկրների միջև համագործակցության հետագա խորացման անհրաժեշտությունը: Խորհրդարանականները մտքեր են փոխանակել տնտեսական կապերի հետագա ընդլայնման և փոխադարձ հետաքրքրություն ներկայացնող հարցերի շուրջ, անդրադարձել Թաթարստանի բազմազգ հասարակությանը հուզող խնդիրներին: Հայ խորհրդարանական պատվիրակությունը Թաթարստանի խորհրդարանում մասնակցել է աշխատանքային ընդունելության, ինչպես նաև՝ այցելել Թաթարստանի հանրապետության Պառլամենտարիզմի թանգարան, որտեղ Հայ- ռուսական միջխորհրդարանական հանձնաժողովի համանախագահներ Հերմինե Նաղդալյանն ու Նիկոլայ Ռիժկովը գրառում են կատարել թանգարանի պատվավոր հյուրերի հուշամատյանում:

Հայ-ռուսական Միջխորհրդարանական հանձնաժողովի 27-րդ նիստի երկրորդ մասի օրակարգի գլխավոր թեման եղել է հայ-ռուսական տնտեսական կապերի զարգացման հնարավորությունները և համագործակցությունը, այդ թվում՝ ուսումնասիրելով Թաթարստանի օրինակը:

Նիստին մասնակցել են Թաթարստանի Պետական խորհրդի նախագահ Ֆարիդ Մուխամեդշինը, երկրի առաջին նախագահ Մինտիմեր Շայմիևը, կառավարության փոխվարչապետը, էկոնոմիկայի նախարարը:

Թաթարստանի խորհրդարանի նախագահը իր ողջույնի խոսքում հայաստանցի գործընկերներին ներկայացրել է երկրի տնտեսական, հասարակական-քաղաքական կյանքի մանրամասները' կենտրոնանալով ազգամիջյան ասպեկտների վրա: Հանդիսանալով Թաթարստանի բազմազգ ժողովուրդների Վեհաժողովի նախագահ' Ֆարիդ Մուխամեդշինը բարձր է գնահատել Թաթարստանում ապրող մեծաթիվ հայկական համայնքի դերը երկրի սոցիալ-տնտեսական, հասարակական-քաղաքական կյանքում, մասնավորապես նշելով. «Այսօր Թաթարստանում ապրում են 7000-ից ավելի հայեր, ովքեր հնարավորություն ունեն հաճախելու կիրակնօրյա կրթօ ջախներ, պահպանելու մայրենի լեզուն, մշակույթը, պատմությունն ու ավանդույթները, և իրենց ակտիվ գործունեությամբ նրանք այսօր մեծապես նպաստում են Թաթարստանի և Հայաստանի հայերի, ինչպես նաև, երկու ազգերի բարեկամության ամրապնդմանը»:

Հայ-ռուսական Միջխորհրդարանական հանձնաժողովի 27-րդ նիստը վարել են հանձնաժողովի համանախագահներ Հերմինե Նաղդալյանն ու Նիկոլայ Ռիժկովը: Նիստի օրակարգային հարցերի շրջանակում հանձնաժողովի անդամները քննարկել են Հայաստանի Հանրապետության և Թաթարստանի Հանրապետության միջև համագործակցության տնտեսական, սոցիալական և մշակութային զարգացման հեռանկարները, այդ թվում' տնտեսական ազատ գոտիների ստեղծման, օտարերկրյա ներդրումների ներգրավման հնարավորությունները: Բազմակողմանի ուսումնասիրվել է վերջին տասը տարիներին Թաթարստանի տնտեսական հն արավորությունները և այսօրվա նվաճումները նավթաքիմիական , բժշկական, մեքենաշինական սարքավորումների արտադրության և տեղեկատվական տեխնոլոգիաների ոլորտներում: Խորհրդարանականները կարևոր են համարել վերջին շրջանում Միջխորհրդարանական համագործակցության հանձնաժողովի աշխատանքների անցկացումը ոչ միայն մայրաքաղաքներում, այլ մարզերում, ինչն առավել նպաստում է միջտարածաշրջանային տնտեսական և մշակութային համագործակցության զարգացմանն ու ընդլայնմանը:

Նիստի օրակարգում քննարկվել են նաև հանձնաժողովի 25-րդ նստաշրջանի շրջանակներում ընդունված որոշումների իրականացման վերաբերյալ հարցեր, այդ թվում՝ Հայաստանի Հանրապետության և Ռուսաստանի Դաշնության միջև համագործակցության զարգացման հեռանկարները՝ Մաքսային միության եւ Եվրասիական տնտեսական տարածության մեջ, ինչպես նաև՝ 5-րդ հայ-ռուսական միջտարածաշրջանային ֆորումի և Միջխորհրդարանական հանձնաժողովի հերթական՝ 28-րդ նիստին առնչվող կազմակերպչական խնդիրներ: Հայ խորհրդարանականները առաջարկել են հերթական հայ-ռուսական միջտարածաշրջանային ֆ որումն անցկացնել Ռուսաստանի Դաշնությունում:

Միջխորհրդարանական 27-րդ նիստի աշխատանքները ամփոփվել են հրավիրված մամուլի ասուլիսում, որի ընթացքում Միջխորհրդարանական հանձնաժողովի համանախագահ, ԱԺ փոխնախագահ Հերմինե Նաղդալյանը մեկնաբանել է Գերմանիայի կողմից նախօրեին ընդունած Հայոց ցեղասպանության ճանաչման մասին որոշումը. ,,Կարծում եմ աշխարհը ևս մեկ անգամ համոզվեց, որ պատմության բոլոր դրսևորումների' նույնիսկ առանձին երկրների համար ամենածանր դեպքերի նկատմամբ արդարացի մոտեցումը' միակ ճանապարհն է, որով ընդհանրապես մարդկությունը պետք է առաջ շարժվի: Եթե մենք ցանկանում ենք, որ ցեղասպանությունները որևէ երկրում երբևէ չկրկնվեն, ապա հարկավոր է , որ այսօր բոլորս' քաղաքական ուժերը, պետությունները, կատարված սխալները ընդունելու քաղաքական կամք և քաղաքացիական համարձակություն ունենան,,:

Թաթարստանի Պետական խորհրդի նախագահ Ֆարիդ Մուխամեդշինը իր հերթին կարևորել է ժողովրդական դիվանագիտությունը, ընդգծելով, որ միջխորհրդարանական նման շփումները թույլ են տալիս ավելի սերտորեն ծանոթանալու և ամրապնդելու հարաբերությունները տարբեր մակարդակներում' քաղաքական, տնտեսական, սոցիալական, մշակութային և հոգևոր:

Հայ-ռուսական Միջխորհրդարանական հանձնաժողովի 27-րդ նիստի ավարտից հետո հայ խորհրդարանականները այցելել են Կազան քաղաքի պատմամշակութային կենտրոն , Թաթարստանի ժողովուրդների բարեկամության տուն-թանգարան, հանդիպել Թաթարստանում բնակվող հայկական համայնքի ակտիվի հետ, որի ընթացքում պատվոգրեր հանձնել Ռուսաստանի հայերի միության Կազանի հայկական ազգամշակութային ինքնավարության նախագահ Միքայել Խաչատությանին և Թաթարստանի Ամետևսկի հայկական համայնքի նախագահ Վոլոդյա Մելքոնյանին:

Հունիսի 4-ին Հայկական խորհրդարանական պատվիրակությունը այց է կատարել Թաթարստանի հանրապետության Լաիշևյան մունիցիպալ մարզ, որտեղ մասնակցել է «Սաբանտույ» կոչվող ազգային տոնին:

Հայ խորհրդարանականները Հայաստան կվերադառնան հունիսի 5-ին: