Դուք չեք ճանաչելու Հայաստանը. Աշոտ Մանուչարյան

«Տարիներ շարունակ պնդում ենք նրա մասին, որ Հայաստանում իրականանում է «տրանսֆորմացիոն» մի գործընթաց, որի հեղինակներն են ամերիկացիները և անգլիացիները, և դա անում են համատեղ ծրագրերի շրջանակում։ Այդ մասին վկայեցին նաև վերջին փուլի գործընթացները։ Սրընթաց ձեւով այս տարածքում ձեւավորվում է մի անդմինիստրացիա, որը լինելու է անգլոամերիկյան շահերի իրականացման ադմինիստրացիա: Խորքային իմաստով, սա է ընթանում, եւ ընթանում է բավական հաջողությամբ: Հայաստանում ուրվագծվում է երկու ծրագիր, առաջինը՝ անգլո-ամերիկյան նախագիծն է, երկրորդը՝ նոր ուժերն են, որոնք նոր ձևերով ու գործիքներով են աշխատում՝ ձևավորելով հայկական համակարգ։ Այս մասին այսօր լրագրողների հետ հանդիպմանն ասաց քաղաքական գործիչ, Ղարաբաղ կոմիտեի նախկին անդամ Աշոտ Մանուչարյանը, հավելելով, որ դա հայկական նախագիծ իրականացնող համախումբն է:

Մանուչարյանը նշեց, որ անգլո-ամերիկյան ադմինիստրացիան փոխաբերական իմաստով ասված «հարվարդյան տղաներն են». «Հարվարդ կարելի է ավարտել, բայց Հարվարդի տղա չլինել»,– ասաց Մանուչարյանը, և հավելեց, որ նրանք քիչ թե շատ կրթություն են ստացել ԱՄՆ–ում, կամ ընդհանրապես Արևմուտքում, որոնք, մի կողմից՝ ինչ–որ հմտություններ են ձեռք բերել, բայց շատ խորքային չեն, և մյուս կողմից էլ՝ նրանց աշխարհայացքը կլիշեներով է ձևավորված՝ սահմանադրական կարգ, այլընտրանքային ընտրություններ, ժողովրդավարություն: Այս բառաբաշարը նրանցն է, դա էժանագին կլիշեներով ձևավորված աշխարհ է, որը իրականության հետ քիչ կապ ունի»,– ասաց նա և հավելեց, որ հենց նրանք էլ, որպես կանոն, դառնում են գործիք այդ աշխարհը ձևավորող համակարգի ձեռքում։

«Մեծ խմբեր կան, որոնք ընդվզեցին՝ արտահայտելով մեր ժողովրդի խորքային երազանքը, և ասացին, որ կյանքն այսպիսին չպետք է լինի։ Նրանք փորձեցին փնտրել նոր կյանքի ձևերը և ճանապարհները, որ տանում են դեպի դրան, և առայժմ հաջողության չեն հասել: Նույն ՀԱԿ-ում հսկայական զանգված չկարողացավ հասնել նրան, որ ինքը տնօրինի իրավիճակը, ուր մնաց՝ երկրում: Հիմա ՀԱԿ-ում տնօրինում է կուսակցական վերնախավը, որ ձեւավորվել է վերջին 15 տարում: Նրանք բանիմաց, խելացի մարդիկ են, բայց գործ չունեն այն փիլիսոփայական համակարգում, որը ձեւավորվել է», – ասաց Մանուչարյանը։

Մանուչարյանը նշեց նաև, որ ընթացք ստանա անգլոամերիկյան գործընթացը, թե հայկական գործընթացը, երկու դեպքում էլ ամբողջությամբ փոխվելու է Հայաստանը, և հավելեց, որ մտավորականությունը հետաքրքիր փնտրտուքների մեջ է։

«Դուք չեք ճանաչելու Հայաստանը»,– ասաց նա։