ԱԺ ՀՀԿ խմբակցության ղեկավարն անդրադարձել է նոր հարկային օրենսգրքի վերաբերյալ գործարար շրջանակների դժգոհություններին

Ազգային ժողովի ՀՀԿ խմբակցության ղեկավար Վահրամ Բաղդասարյանը չի հիշում որևէ հարկային օրենք, որը դժգոհությունների առիթ չի առաջացրել գործարարների մոտ: Ազգային ժողովում լրագրողների հետ զրույցում ԱԺ ՀՀԿ խմբակցության ղեկավարն, անդրադառնալով հարկային օրենսգրքի նախագծի վերաբերյալ գործարար շրջանակների, պատգամավորների դժգոհություններին նշեց, որ դժգոհություններ միշտ եղել են, սակայն քննարկումների արդյունքում միշտ էլ հնարավոր է եղել նրանց հետ ընդհանուր հայտարարի գալ: «Չի կարող մի բանը բոլորի համար լավ լինել: Մենք հասկանում ենք, որ կան տարբեր շահեր, սակայն, եթե ՀՀԿ-ն կուլ գնա այդ շահերին, մենք չենք կարող ունենալ այն հարկային օրենսգիրքը, որն անհրաժեշտ է մեր պետության ապագա զարգացման համար: Իհարկե, մենք պետք է լսենք նաև նրանց, հաշվի առնենք նրանց առաջարկները, մենք ոչ թե առանձին ոլորտի, այլ մեր ողջ տնտեսության հաջողության համար պետք է մտածենք»,- նշեց Բաղդասարյանը:

Դիտարկմանը, թե արդեն «սպառնալիքներ» են հնչում մարդկանց փողոց հանելու մասին, Վահրամ Բաղդասարյանը պատասխանեց. «Այդ հայտարարությունները ես համարում եմ նախընտրական հայտարարություններ: Ես այդպիսի քայլերի մեջ արդյունք չեմ տեսնում: Այն քննարկումները, որոնք պետք է տեղի ունենան Ազգային ժողովում, այդտեղ պետք է ոտքի կանգնել, մասնակցել այդ քննարկումներին, ոչ թե ժողովրդին է պետք ոտքի հանել: Եթե դրա կարիքը լինի, ժողովուրդը ոտքի կկանգնի, պետք չէ, որ իրենք ժողովրդին ոտքի հանեն»: