Սրբազան Քահանայապետի այցին ընդառաջ Գյումրու Սրբոց Նահատակաց եկեղեցում կկայանա հոգևոր համերգ

Գյումրիում պատրաստվում են Հռոմի Ֆրանցիսկոս Սրբազան Քահանայապետի այցին: Վարդանանց հրապարակում կառուցվում է այն խորանը և բեմահարթակը, որի վրա մատուցվելու է Սբ Պատարագը: Սրբազան Քահանայեպետի այցին նախապատրաստվում են նաև Գյումրու իշխանությունները: Բարեկարգվում են Սբ Ամենափրկիչ եկեղեցու հա րակից հատվածը և այն փողոցները, որտեղից Սրբազան Քահանայապետը պետք է անցնի: Մինչ այդ, Գյումրի այցելած բոլոր հյուրերին անակնկալ է պատրաստել Հայ Կաթողիկե առաջնորդարանը. հունիսի 24-ի երեկոյան նախատեսվում է համերգ Գյումրու «Սրբոց Նահատակաց» Հայ Կաթողիկե առաջնորդանիստ եկեղեցում, որտեղ մենահամերգով հանդես կգա Սրբոց Նահատակաց եկեղեցու «Ալաշկերտ» հոգևոր երգչախմբի մեներգչուհի Մերի Մկրտչյանը' նախաձեռնությամբ Գյումրու հայ կաթողիկէների ժողովրդապետ Արժ. Տ. Գրիգոր ավագ քահանա Մկրտչյանի:

««Հոգևոր համերգ՝ ընդառաջ Սրբազան Քահանայապետի այցին» խորագիրը կրող համերգի նպատակն է տոնական դարձնել Սրբազան Քահանայապետի այցը Հայաստան և, մասնավորապես, Գյումրի, նախապատրաստել հաջորդ օրը կայանալիք Սբ Պատարագին՝ ապահովելով հաճելի և հարուստ հոգևոր մտթնոլորտ՝ որպես գեղեցիկ մի նախերգանք այս պատմական հույժ կարևոր հոգևոր իրադարձության համար: Այդ մենահամերգը Գյումրու հայ կաթողիկե համայնքի և Սրբոց Նահատակաց առաջնորդանիստ եկեղեցու սպասումի, Սրբազան Պապի այցի առիթով հոգևոր խանդավառության մի յուրահատուկ արտահայտություն է»,- «Արմենպրես»-ի հետ զրույցում նշեց Գյումրու հայ կաթողիկեների ժողովրդապետ Արժ. Տ. Գրիգոր ավ. քհն. Մկրտչյանը:

Մենահամերգի ընթացքում կհնչեն հոգևոր ստեղծագործություններ, շարականներ, հատվածներ Սբ Պատարագից:

Երևանի Կոմիտասի անվան պետական կոնսերվատորիայի Գյումրու մասնաճյուղի վոկալ ամբիոնի դասախոս, «Ամադեուս» մրցույթ-փառատոնի «Լավագույն հոգևոր երգի կատարում» անվանակարգի գլխավոր մրցանակակիր, բազում մրցույթների հաղթող, «Ալաշկերտ» հոգևոր երգչախմբի մեներգչուհի Մերի Մկրտչյանը, շատ անգամներ մենակատարումներով հանդես է եկել Գյումրու պետական սիմֆոնիկ նվագախմբի հետ, իսկ 2005-2007թթ.մենահամերգային ծրագրերով հանդես է եկել Ֆրանսիայի մի շարք քաղաքներում' Փարիզի Աստվածամոր տաճարում, Մարսելի Նոտր դամ դե լա Գար եկեղեցում ինչպ ես նաև Լիոնի Ֆուր Վիեռ եկեղեցում, նաև Իրանի Թեհրան քաղաքում, սակայն այս համերգը երգչուհու համար առանձնահատուկ է: «Անշուշտ, անչափ պատասխանատու է ու շատ տարբերվող, քանի որ հնչելու են միայն հոգևոր գործեր՝ հիմնականում լինելու են հայկական շարականներ, բայց հնչելու են նաև արևմտաեվորպական կոմպոզիտորների գործերից»,- ընդգծեց երգչուհին:

Հայ կաթողիկե Սրբոց Նահատակաց առաջնորդանիստ եկեղեցու «Ալաշկերտ» հոգևոր երգչախումբը ձևավորվել է 2010թ., Գյումրիի ժողովրդապետ Արժ. Տ. Գրիգոր ավ. քհն. Մկրտչյանի ջանքերով: Քառաձայն երգչախմբի գեղարվեստական ղեկավարն է ՀՀ Արվեստի վաստակավոր գործիչ Ջեմմա Քաղցրիկյանը, նվագակցողն է երաժիշտ Գոհար Շախուլյանը։

Արմենուհի Մխոյան