Ալի Քերիմլիի պատասխանը Ալիևի «զարգացման հեքիաթին»

Նավթի եւ մանաթի էժանացման հետեւանքով խորը տնտեսական ճգնաժամում հայտնված էներգակիրների արտահանումից կախված Ադրբեջանի նախագահ Իլհամ Ալիեւը մուսուլմանական Ռամադան ամսվա հետ կապված իֆտարի (ընթրիքի) սեղանի շուրջ հայտարարել է, որ Ադրբեջանը «բոլոր բնագավառներում մեծ զարգացման ճանապարհ է անցել եւ հաջողություններ գրանցել»:

Ինչպես հաղորդում է «Արմենպրես»-ը' վկայակոչելով azadliq.info կայքը, Ալիեւի այդ «նմանը չունեցող զարգացման հեքիաթին» Facerbook-ի իր էջում պատասխանել է Ադրբեջանի ընդդիմադիր Ժողովրդական ճակատ կուսակցության առաջնորդ Ալի Քերիմլին:

«Ադրբեջանցիները միամտաբար կարծում էին, թե ճգնաժամում հայտնված Իլհամ Ալիեւն այլեւս չի խոսելու զարգացումից: Կարծում էինք, որ ապրուստի միջոց չունենալու համար հարյուրավոր մարդկանց ինքնասպանություն գործելու, հազարավոր մարդկանց բուժման համար փող չգտնելու պատճառով մահանալու պայմաններում գտնվող երկրի ղեկավարը այլեւս չի խոսի զարգացումից:

Ուսման վարձը վճարել չկարողանալու պատճառով 17 հազար ուսանողներին բարձրագույն ուսումնական հաստատություններից վռնդվելու, յուրաքանչյուր 5 երեխայից 2-ի նորմալ չսնվելու, ղարաբաղյան պատերազմում սպանված զինծառայողի ընտանիքի' հարազատի «արյան փողը» չստանալու, պատերազմի մասնակցի եւ հաշմանդամի' բուժվել չկարողանալու, համատարած գործազրկության, բանկերի կողմից միլիոնավոր մարդկանց գերի վերցնելու պայմաններում գտնվող երկրում ինչպե՞ս կարելի է խոսել զարգացումից:

Ընդամենը մեկ տարվա ընթացքում պետական բյուջեն դոլարային հաշվարկով 2 անգամից ավելի, համախառը ներքին արտադրանքը (ՀՆԱ)' 29 տոկոսով, միջին աշխատավարձը' 48 տոկոսով նվազած երկրում դարձյալ խոսել նմանը չունեցող զարգացումից հնարավոր չէ:

Ինչպե՞ս կարող է զարգացումից խոսել մի երկրի ղեկավար, որն արդեն սպառել է պետության արտարժույթի պահուստի 70 տոկոսը, պարտք վերցնելու համար ծեծում է աշխարհում բոլոր դռները: Սակայն, Իլհամ Ալիեւը մեզ բոլորիս ապացուցեց, որ դա հնարավոր է: Իլհամ Ալիեւը իֆտարի սեղանին պահքի մեջ գտնվող մուսուլմանների հետ խոսել է «բոլոր բնագավառներում մեր երկրի ամենաշատ զարգացման ճանապարն անցնելու եւ հաջողություն ունենալու» մասին: Ահա, այսպես: Խոսք ունե՞ք», -հարցադրել է նա: