«Սա Արցախի հայկական հողերի հանձնման ընդհանուր նախագծի հերթական փուլն է»

«Մենք ենք տերը մեր երկրի» քաղաքացիական նախաձեռնությունը հայտարարություն է տարածել, որում ասված է.

«Հայաստանի Հանրապետության իշխանությունները չեն հրաժարվում իրենց դավաճանական քաղաքականությունից ու կրկին Ազգային ժողովի օրակարգում ընգրկել են Հակաօդային պաշտպանության ղեկավարումը Ռուսաստանի Դաշնությանը հանձնելու հարցը: Հայաստանի կառավարությունն այսօր ընդունել է որոշում առաջարկել Ազգային ժողովի նախագահին հունիսի 27-ին ժամը 12-ին գումարել խորհրդարանի արտահերթ նստաշրջան, որի օրակարգում ընդգրկված հարցերից է նաև «Հայաստանի և Ռուսաստանի միջև Հավաքական անվտանգության կովկասյան տարածաշրջանում հակաօդային պաշտպանության միավորված տարածաշրջանային համակարգ ստեղծելու մասին» համաձայնագրի վավերացման հարցը:

Հակաօդային պաշտպանության ղեկավարումը օտար պետությանը հանձնելը դա դավաճանություն է, որը մահացու սպառնալիքի տակ է դնում ոչ միայն Արցախի բնակչության և մեր զինվորների ու սպաների կյանքը, այլ նաև Հայաստանի: Առավել ևս, որ այդ պետությունն է հանդիսանում Ռուսաստանը, որի բանակը «ուշացել» է Սումգայիթում ու Բաքվում, երբ Հայ մարդկանց էին կոտորում: Կամ Կոլցո գործողության ժամանակ, երբ Ադրբեջանի հետ համատեղ ցեղասպանության ենթարկեցին Գետաշենն ու Շահումյանի շրջանը և իհարկ է ադրբեջանին 5 միլիարդ դոլարի հարձակողական զենքի վաճառքը:

Ակնհայտ է, որ սա Արցախի հայկական հողերի հանձնման ընդհանուր նախագծի հերթական փուլն է և Ապրիլյան քառօրյա պատերազմի տրամաբանական շարունակությունը: Հայկական հողերի հանձնման այս ընդհանուր նախագծի մասն են կազմում նաև Ժիրայր Սեֆիլյանին մեկուսացնելը, որը սկսել էր նախաձեռնություն կամավորականների ուժերով վերականգնելու Ապրիլյան պատերազմի տարածքային կորուստները:

Մենք վերահաստատում ենք մեր պատրաստակամությունը կանխելու այս դավաճանության դրսևորումը:

Երկուշաբթի՝ Հունիսի 27-ին, ժամը 12-ին, մենք հավաքվում ենք Ազգային ժողովի՝ Բաղրամյան փողոցի մուտքի մոտ, որ կանխենք Ազգային ժողովի կողմից այդ համաձայնագրի վավերացումը: Այդ օրը կսկսվի անժամկետ նստացույց ԱԺ մոտ, քանի որ արտահերթ նստաշրջանը տևելու է 4 օր և անհայտ է թե որ օրն է համաձայնագիրը դրվելու քվեարկության:

Մեր նպատակն է թույլ չտալ այս համաձայնագրի վավերացումը, որը հնարավոր կլինի զանգվածային բողոքի ակցիաներ կազմակերպելով: Կոչ ենք անում բոլորին առավելագույնս տարածել այս հայտարարությունը և երկուշաբթի՝ հունիսի 27-ին առավոտյան ժամը 12-ից լինել Ազգային ժողովի շենքի մոտ»։