Սպանված ռուս օդաչուի ընտանիքին Քեմերում տուն առաջարկած թուրք քաղաքապետը կհեռացվի կուսակցությունից

Թուրքիայի կողմից ռուսական Սու-24 ինքնաթիռի խոցման հետևանքով զոհված ռուս օդաչուի ընտանիքին բնակարան նվիրելու առաջարկ արած Քեմերի քաղաքապետ Մուստաֆա Գյուլին կհեռացնեն կուսակցությունից: Ինչպես հաղորդում է «Արմենպրես»-ը' վկայակոչելով թուրքական «Հուրիեթ» պարբերականը, «Ազգայնական շարժում» կուսակցության ղեկավար Դևլեթ Բատչելին հայտարարել է, որ Մուստաֆա Գյուլին կուսակցության շարքերից հեռացնելու նպատակով դիմել են էթիկայի հանձնաժողովին:

Մասնավորապես, Բահչելին զայրացել է այն փաստի վրա, որ Քեմերի քաղաքապետը ցանկանում է պարգևատրել «թուրքմենների մարդասպանին»: «Այս պահից սկսած Քեմերի քաղաքապետը որևէ բարոյական և մարդկային կապ չունի մեզ հետ»,- ասել է «Ազգայնական շարժում» կուսակցության ղեկավարը:

Մուստաֆա Գյուլը, այդուհանդերձ, հայտարարել է, որ շարունակում է կանգնել իր առաջարկի հետևում: Նա նաև տեղեկացրել է, որ սպանված օդաչուի ընտանիքին տոն նվիրելու առաջարկն իր անձնական նախաձեռնությունն է:

Թուրքական Անթալիայի Քեմեր հանգստավայրի քաղաքապետ Մուստաֆա Գյուլը նախօրեին հանդես էր եկել ռուսաստանյան Սու-24 ռմբակոծիչի սպանված օդաչու Օլեգ Պեշկովի ընտանիքին բնակարան նվիրելու առաջարկով: Մուստաֆա Գյուլի կարծիքով' իրենց այդ առաջարկը «կօգնի Ռուսաստանի եւ Թուրքիայի միջեւ հարաբերությունների վերականգնմանը»:

Օդաչուի ընտանիքը, սակայն, հրաժարվել էր որևէ փոխհատուցում ընդունելուց: Օդաչուի եղբայր Պավել Պեշկովը հայտնել էր, որ այդ առաջարկն ուղղակի անհեթեթություն է: