Ալեքսանդր Ցինկերը զուգահեռներ է տեսնում ապրիլին Արցախի դեմ Ադրբեջանի գործողությունների և ահաբեկչական խմբերի միջև

Իսրայելի Կնեսետի նախկին պատգամավոր, Իսրայել-Հայաստան միջխորհրդարանական բարեկամական խմբի հիմնադիր Ալեքսանդր Ցինկերը զուգահեռներ է տեսնում ապրիլի սկզբին Արցախի դեմ պատերազմի ժամանակ Ադրբեջանի գործողությունների և ահաբեկչական խմբավորումների վարվելակերպի միջև: Նա «Արմենպրես»-ի հետ զրույցում ակնհայտ համարեց, որ ապրիլին խախտվեցին ոչ միայն երկու երկրների միջեւ ռազմական գործողությունների իրականացման կանոնները, այլեւ միջազգային մարդասիրական իրավունքի նորմերը:

Հունիսի 15-ին հայտնի դարձավ, որ Իսրայելի Կնեսետի պատգամավորները պատրաստում են նոր օրինագիծ, համաձայն որի՝ կդադարեցվի զենքի վաճառքը այն երկրներին, որոնք իրականացրել են մարդու իրավունքների մեծամասշտաբ խախտումներ: «Արմենպրես»-ը հետաքրքրվեց' արդյո՞ք ապրիլի 10-ին Բաշ Քարվենդ բնակավայրի մոտակայքում հայկական կողմին հանձնված ԼՂՀ Պաշտպանության բանակի 18 զինծառայողների մարմինների, ինչպես նաեւ քառօրյա պատերազմի ընթացքում Մարտակերտի շրջանի Թալիշ գյուղում 3 տարեց բնակիչների խոշտանգումները չեն համարվում մարդու իրավունքների մեծամասշտաբ խախտումներ, եւ օրինագծի ընդունման դեպքում արդյոք չպե՞տք է ներառել Ադրբեջանը այդ երկրների ցանկում, Ալեքսանդր Ցինկերը պատասխանեց.

«Իսրայելը, լինելով ռազմական տեխնիկայի ամենախոշոր արտահանողներից մեկը, երբեք չի վաճառել եւ այժմ էլ չի վաճառում սպառազինություն այն երկրներին, որոնց դեմ միջազգային հանրությունը համապատասխան արգելանք է սահմանել: Նման օրինագծերը հաճախ են առաջադրվում Կնեսետում, սակայն 10000 օրինագծից միայն 400-ն է վերջնական ընթերցման ուղարկվում: Իսկ այդ բոլոր ձեռք բերված փաստերը պետք է հասցվեն համապատասխան քաղաքական եւ իրավական միջազգային կառույցներին, որոնք եւ պետք է որոշեն Ադրբեջանի նկատմամբ սահմանվող պատժի չափը»: