Ճապոնական Նագոյա քաղաքը 10 հազար դոլար է տրամադրել Գյումրիի երաժշտական դպրոցին

Ճապոնիայի Նագոյա քաղաքը 10.000 ԱՄՆ դոլար գումար է տրամադրել Գյումրիին: Գյումրու քաղաքապետ Սամվել Բալասանյանն հուլիսի 13-ին ընդունեց գյումրեցի սաքսաֆոնահար, 14-ամյա Ավետիս Հովսեփյանին: Երիտասարդ երաժիշտը Ճապոնիայում Հայաստանի Հանրապետության դեսպան Հրանտ Պողոսյանի նախաձեռնությամբ, սույն թվականի հուլիսի 8-ին Ճապոնիայի Նագոյա քաղաքում մասնակցել է Ստեֆանի Թոփալյանի համերգ-ճաշկերույթին:

Ճաշկերույթի նպատակը եղել է հանգանակության կազմակերպումը՝ Գյումրու քաղաքապետարանի ենթակայության Ա. Բրուտյանի անվան երաժշտական դպրոցին աջակցություն ցուցաբերելու նպատակով: Համերգ-ճաշկերույթին Ավետիս Հովսեփյանը կատարել է երեք ստեղծագործություն՝ հայկական, դասական և ջազային: Միջոցառման ընթացքում հանգանակվել է մոտ 10.000 ԱՄՆ դոլար:

Գյումրու քաղաքապետը Սամվել Բալասանյանը, ողջունելով երիտասարդ երաժիշտ Ավետիս Հովսեփյանին, իր խոսքում ընդգծեց, որ հանգանակված գումարը կծախսվի դպրոցի կարիքների համար: Քաղաքապետը Ավետիսից հետաքրքրվեց Ճապոնիա կատարած այցի,հետագա անելիքների մասին: Ավետիսը մանրամասներ պատմեց ընդունելության, իր հանդեպ ցուցաբերված վերաբերմունքի և համերգ-ճաշկերույթի մասին: Ավետիսի ծնողներն, ովքեր ներկա էին հանդիպմանը, շնորհակալություն հայտնեցին քաղաքապետին իրենց որդու հանդեպ ցուցաբերված վերաբերմունքի և ջերմ ընդունելության համար: