Ընտրություններից առաջ ունեինք ներքին որոշում, որ եթե թիմով մտնում ենք ԱԺ, ես հրաժարական չեմ տալիս. Լյուդմիլա Սարգսյան

«Ես երբևիցե նման կարծիք չեմ արտահայտել, ընտրություններից առաջ ունեինք ներքին որոշում, որ եթե թիմով մտնում ենք ԱԺ, ապա ես հրաժարական չեմ տալիս, այնպես որ` անհիմն տարածված լուրեր են», - այս մասին Լուրեր.com-ի հետ զրույցում ասաց ՍԴՀԿ ատենապետ Լյուդմիլա Սարգսյանն, անդրադառնալով իր մանդատը վայր դնելու մասին լուրերին:

Նշենք նաև, որ այս լուրը հերքվել էր նաև ՀՀ առաջին նախագահ Լևոն Տեր-Պետրոսյանի կողմից:

ՍԴՀԿ ատենապետի կարծիքով, նմանատիպ լուրերով փորձում են ներսում կրքեր բորբոքել: «Համենայնդեպս դա բարեկամների վարքագիծ չի: Նախագահից շնորհակալ եմ, որ մեկընդմիշտ փարատեց բոլորի կասկածները, սպասելիքները և կարծում եմ, որ այսուհետրև նմանատիպ սուտ լուրեր չեն տարածվի: Ես ամեն դեպքում կարծում եմ, որ մեր թիմը շատ արդյունավետ թիմ է լինելու ԱԺ-ում և մեզանից յուրաքանչյուրը պայքարելու է ամեն մարդու համար, ամեն մեկի համար, ով հնարավորություն չունեցավ ներկայացված լինելու այնտեղ, արտահայտելու ենք մեր ժողովրդի կարծիքները, ժողովրդին մտահոգող խնդիրները և փորձելու ենք պաշտպանել նրանց շահերը: Կարծում եմ, որ մեր թիմը փոքր, բայց արդյունավետ թիմ է լինելու», - նշեց Լյուդմիլա Սարգսյանը: