Սահմռկեցուցիչ տեղեկություններ, որոնք մնացել են չհերքված

«Հետք» էլեկտրոնային պարբերականը տեղեկություն է հրապարակել այն մասին, որ «Սասնա ծռեր» զինված խմբի անդամներից Հովհաննես Հարությունյանը, «Դատապարտյալների հիվանդանոց» ՔԿՀ-ում պահվում է անմարդկային պայմաններում, մասնավորապես, վերջինիս հայտարարության համաձայն, ինքը գիշերը չի կարողացել աչք փակել, քանի որ խավարասերը բարձրացել է բաց վերքի վրա:

Այս մասին այսօր հայտնել է նաև պաշտպանը և հավելել, որ զինված խմբի վիրավոր անդամը իր վերքի վրա է սատկացրել խավարասերին, կա արյան վարակման վտանգ, միջատները վխտում են սննդամթերքի վրա, վիրավոր մարդը պահվում է բորբոսնած առաստաղով թե պատերով սենյակում, շուրջ 140 հիվանդին 1 բժիշկ է հասնում, հասարակ վիրակապը փոխելու համար բժիշկ են կանչում «Էրեբունի» ԲԿ-ից և այլն: Այս ամենն այն աստիճան անմարդկային ու դաժան է, որ նույնիսկ դժվար է պատկերացնել: Համապատասխանո՞ւմ է իրականությանը, թե ոչ' այս պահին դժվար է միանշանակ ասել, բայց հավանաբար համապատասխանում է, այլապես վիրավոր վիճակում և բժիշկներից կախման մեջ գտնվող մարդը, ինչպես նաև փաստաբանը դժվար թե համարձակվեին ստել:

Բացի այդ, քրեակատարողական վարչության հանրային կապերի բաժինն այսօր իր տարածած հայտարարությամբ չի հերքել «Դատապարտյալների հիվանդանոց» ՔԿՀ-ում խավարասերների առկայության մասին տեղեկությունը: Դրա փոխարեն, հիշյալ վարչությունը տեղեկացրել է, որ «հուլիսի 7-ին և 26-ին, սահմանված չափորոշիչներին համապատասխան, ՀՀ ԱՆ «Դատապարտյալների հիվանդանոց» ՔԿՀ-ում կատարվել են ախտահանման և մակաբույծների ոչնչացմանն ուղղված աշխատանքներ» և էլի նման բաներ, վերջում էլ նշել, որ կից հրապարակում են «Երևանի կանխարգելիչ ախտահանում» ՓԲԸ-ի կողմից տրամադրված 2016թ.' ծառայությունների մատուցման թերթիկները: Հետո ի՞նչ, որ գոյություն ունեն նման թերթիկներ… Հնարավոր չէ՞, որ իրականում մակաբույծների ոչնչացման թունաքիմիկատները ժամկետանց կամ անորակ են եղել, կամ չեն կիրառվել անհրաժեշտ չափաքանակով: Հնարավոր չէ՞, որ «Դատապարտյալների հիվանդանոց» ՔԿՀ-ում կամ նրա առանձին հիվանդասենյակներում, տարածքներում հիշյալ ծառայությունները չեն մատուցվել, այսինքն' ախտահանման և մակաբույծների ոչնչացմանն ուղղված աշխատանքներ իրականում չեն կատարվել, բայց ներկայացվել են կատարված: Թող որևէ մեկը չհամարձակվի ասել, թե դա տեսականորեն հնարավոր չէ: Այս պետության մեջ տարբեր պաշտոնյաների կողմից չկատարված աշխատանքները կատարված ցույց տալու այնպիսի խայտառակ փաստեր են բացահայտվել ավելի վաղ (հարկ եղած դեպքում կարող ենք հրապարակել այդ փաստերը), որ վերոնշյալ տարբերակը հնարավոր չէ բացառել: Այնպես որ, ավելի լավ կլինի մտածել այնպես աշխատելու մասին, որ քրեակատարողական հիմնարկներում և, հատկապես, «Դատապարտյալների հիվանդանոց» ՔԿՀ-ում պայմանները, վիճակը չլինեն այնպիսին, որ հիշեցնեն համակենտրոնացման ճամբար…