«Բարև Երևանը» դիմել է ՀՔԾ՝ Արմեն Մարտիրոսյանի և Դավիթ Սանասարյանի կալանքի հարցով

Երևանի ավագանու «Բարև Երևան» խմբակցությունը դիմել է ՀՔԾ՝ խմբակցության անդամներ Արմեն Մարտիրոսյանի և Դավիթ Սանասարյանի կալանքի հարցով:

Դիմումում, մասնավորապես, ասվում է.

«ՀՀ հատուկ քննչական ծառայությունից պահանջում ենք հարգել երեւանցիների ընտրությունն ու ազատ արձակել ընտրյալներ Արմեն Մարտիրոսյանին եւ Դավիթ Սանասարյանին:

Երեւանի ավագանու «Բարեւ Երեւան» խմբակցությունը Արմեն Մարտիրոսյանի եւ Դավիթ Սանասարյանի կալանավորման փաստի առթիվ այսօր նամակով դիմեց ՀՀ հատուկ քննչական ծառայության պետ պարոն Վահրամ Շահինյանին: Նամակն ամբողջությամբ ներկայացնում ենք ստորեւ.

«Երկու ամսով կալանավորվել են Երեւանի ավագանու «Բարեւ Երեւան» խմբակցության անդամներ Արմեն Մարտիրոսյանն ու Դավիթ Սանասարյանը, որով խոչընդոտվել է խմբակցության գործունեությունը:

Նկատի ունենալով խմբակցության փոքրաթիվ կազմը՝ կալանավորված մեր ընկերներից յուրաքանչյուրի ներկայությունն ու մասնակցությունը խմբակցության գործունեությանը շատ արժեքավոր է:

Հետեւելով նրանց փաստաբանների հիմնավորումներին՝ համոզված ենք, որ Արմեն Մարտիրոսյանի եւ Դավիթ Սանասարյանի նկատմամբ ՀՀ հատուկ քննչական ծառայության կողմից հետապնդում է իրականացվում իրենց քաղաքական հայացքների համար, որը հակասահմանադրական է:

Պահանջում ենք շուտափույթ ազատ արձակել մեր ընկերներին: Նրանք երեւանցիների կողմից ընտրված անձինք են, եւ նրանց կալանավորմամբ դուք խոչընդոտում եք մեր քաղաքացիների նկատմամբ իրենց պարտավորությունների իրականացմանը, որն իրեն ժողովրդավարական հռչակած երկրի համար անհամատեղելի երեւույթ է:

ՀՀ հատուկ քննչական ծառայությունը պարտավոր է հարգել երեւանցիների ընտրությունն ու շուտափույթ ազատ արձակել Երեւանի ավագանու անդամներ Դավիթ Սանասարյանին եւ Արմեն Մարտիրոսյանին»: