Տիգրան Մանսուրյանը գնացել է «Սասնա ծռերի» անդամ Աշոտ Պետրոսյանի հետ հանդիպման

Այսօր՝ օգոստոսի 8-ին Հատուկ Քննչական Կոմիտեից ստացվել է Տիգրան Մանսուրյանի և Ռոբերտ Ամիրխանյանի՝ «Սասնա ծռերի» անդամ Աշոտ Պետրոսյանի հետ հանդիպման թույլտվությունը: Ինչպես փոխանցել է «Հելսինկյան ասոցացիան», փաստաբան Արայիկ Պապիկյանը հանդիպել է Տիգրան Մանսուրյանի հետ, նրանք միասին ուղևորվել են «Դատապարտյալների հիվանդանոց» ՔԿՀ՝ հանդիպման:

Հիշեցնենք, որ «Սասնա ծռերի» անդամ, նկարիչ Աշոտ Պետրոսյանը ավելի վաղ ցանկություն էր հայտնել հանդիպել կոմպոզիտորներ Տիգրան Մանսուրյանի և Ռոբերտ Ամիրխանյանի հետ: Նա օգոստոսի 4-ից հայտարարել է հացադուլ և հրաժարվել բուժօգնությունից: Աշոտ Պետրոսյանը գտնվում է «Դատապարտյալների հիվանդանոցում», նա ունի հրազենային վնասվածք:

Աշոտ Պետրոսյանին մեղադրանք է առաջադրվել Քրեական օրենսգրքի 219-րդ հոդվածի 3-րդ մասի 1-ին կետով (Շենքեր, շինություններ, տրանսպորտի, հաղորդակցության կամ կապի միջոցներ, այլ հաղորդակցության ուղիներ զավթելը կամ դրանք պահելը, որը կատարվել է կազմակերպված խմբի կողմից) եւ 235-րդ հոդվածի 3-րդ մասով (Ապօրինի կերպով զենք, ռազմամթերք, պայթուցիկ նյութեր կամ պայթուցիկ սարքեր ձեռք բերելը, իրացնելը, պահելը, փոխադրելը կամ կրելը, որը կատարվել է կազմակերպված խմբի կողմից): Նա կալանավորված է: