Ռուսաստանը Հայաստանի հետ աշխատում է զենքի մատակարարման հարցով և կատարում է իր պարտավորությունները. Պուտին

TASS-ի փոխանցմամբ` Ռուսաստանը Հայաստանի հետ աշխատում է զենքի մատակարարման հարցով և կատարում է իր պարտականությունները: Այդ մասին Ռուսաստանի նախագահ Վլադիմիր Պուտինը հայտարարել է իր հայ գործընկեր Սերժ Սարգսյանի հետ համատեղ մամլո ասուլիսի ժամանակ' պատասխանելով Հայաստանին և Ադրբեջանին զենք մատակարարելու վերաբերյալ հայ լրագրողի հարցին:

«Ինչ վերաբերում է զենքին, ապա մենք Հայաստանի հետ ունենք աշխատանքային ծրագիր,- նշել է ՌԴ նախագահը:- Հայաստանը ՀԱՊԿ անդամ է և մեր դաշնակիցը, մենք ունենք փոխադարձ պարտավորություններ, և Ռուսաստանը միշտ հավատարիմ է իր պարտավորություններին և միշտ կատարում է դրանք»,- ասել է Պուտինը:

Պուտինը ավելացրել է, որ զենքի ժամանակակից շուկայում ցանկացած երկիր կարող է գնել գործնականորեն ցանկացած զենք:

«Եվ օրինակ, այնպիսի երկիր ինչպիսին Ադրբեջանն է՝ նավթ արդյունահանող երկիր, արագ աճող տնտեսությամբ, բավականին մեծ ծավալով ոսկեարժութային պահուստներով երկիր, իհարկե, ի վիճակի է գնել, եթե իրեն ձեռնտու է»,- ասել է Պուտինը: Դրա հետ մեկտեղ նա ընդգծել է, որ անհրաժեշտ է գոյություն ունեցող խնդիրները լուծել խաղաղ ճանապարհով: