Կուսակցությունը ոնց որոշի, այդպես էլ կանենք. Հովհաննես Հովհաննիսյան

ՀԱԿ-ի անդամ Հայաստանի լիբերալ կուսակցությունը չի լքի կոնգրեսի շարքերը, եթե այդպես որոշեն կուսակցության անդամները։ Այդ մասին Լուրեր.com-ի հետ զրուցում հայտնեց կուսակցության նախագահ Հովհաննես Հովհաննիսյանը։

Պատասխանելով լրագրողի հարցին, որ եթե կուսակցությունը որոշում կայացնի ՀԱԿ–ից դուրս չգալու մասին, հնարավոր է, որ Հովհաննիսյանը միայնակ դուրս գա կոնգրեսից՝ Հովհաննիսյանը նշեց. «Իհարկե ոչ, ես իմ կուսակցության հետ կլինեմ, կուսակցությունը ոնց որոշի, այդպես էլ կանենք»։ 

Իսկ այն հարցին, թե կա՞ն արդյոք կուսակցության անդամների միջև տարաձայնություններ Կոնգրեսից դուրս գալու հարցով, Հովհաննիսյանը պատասխանեց, որ պետք է սպասել կուսակցության անդամների հետ քննարկման ավարտին, ինչը տեղի կունենա վաղը։  

Իսկ թե որն է պատճառը, որ ՀԼԿ–ում ծագել է Կոնգրեսից դուրս գալու միտքը, արդյոք կա՞ն ինչ–որ հակասություններ Կոնգրեսի որդեգրած ռազմավարության առումով, կուսակցության նախագահը պատասխանեց, թե «հակասության խնդիր չկա, քննարկման խնդիր է»։ 

Նշենք, որ «Ժողովուրդ»–ի այսօրվա համարում թերթը հայտնում է, որ իր տեղեկություններով ՀԼԿ քաղխորհրդի անդամները դեմ են ՀԱԿ–ից դուրս գալուն։ Իսկ քաղխորհրդի անդամ Վահրամ Հարությունյանը նույնիսկ նշել է, որ իրենք նման հարց չեն քննարկել, և մամուլում տեղ գտած հրապարակումներն արտահայտում են Հովհաննես Հովհաննիսյանի անձնական տեսակետը։ 

Հիշեցնենք, որ օրերս կայքերից մեկի հետ զրույցում Հովհաննիսյանը նշել էր, որ Հայ ազգային կոնգրեսում խորհրդարան մտնել-չմտնելու հարցը չի քննարկվել և մտնելու մասին իրենք տեղեկացել են վերջին հանրահավաքից:

«Ինձ նման քննարկման չեն հրավիրել: Ինչ վերաբերում է նրան, թե հետագայում պարզաբանումներ ինձ տվել են, թե ոչ՝ չէ՛, չեն տվել»,- նշել է Հովհաննիսյանը: