Հայաստանի եզդիները բարձրաձայնում են «ԻՊ»-ի կողմից եզդիների ստրկացման և ստրկավաճառության դեպքերի մասին

Ստրկավաճառության զոհերի և դրա վերացման հիշատակման միջազգային օրվա առթիվ հայտարարությամբ է հանդես եկել «Միդիա-Շանգալ» եզդիների ազգային միավորում ՀԿ խորհրդի նախագահ Ամո Շարոյանը: «Արմենպրես»-ին տրամադրած հայտարարության մեջ մասնավորապես շեշտվում է.

«Այս օրվա ամսաթիվն ընդունվել է դեռևս 1791 թ. Սան Դոմինգոյի և Հայիթիի ստրուկների ապստամբության օրը: Այդ օրվանից էլ միջազգային մակարդակով դատապարտվել է ստրկությունը Աշխարհում ամենասոսկալի ողբերգությունը:
Ցավոք, այսօր էլ Աշխարհում դեռևս հազարավոր մարդիկ տուժվում են այդ անմարդկային ողբերգությունից, ստրկությունից և ստրկավաճառությունից:

2014 թ. օգոստոսի 3-ին «Իսլամական պետություն» կոչվող հրեշները հարձակվեցին Իրաքի Հանրապետության Շանգալ եզդիաբնակ նահանգի վրա և անխնա կոտորեցին բնակչությանն' իրենց ճանապարհին ոչնչացնե լով ամեն ինչ: Իսկ հազարավոր եզդի երեխաների և կանանց տարան ստրկության և ստրկավաճառության: Եզդուհիները 21-րդ դարում վաճառվեցին Մերձևավոր Արևելքում նույնիսկ Աֆղանստանում: Եզդի երեխաների և կանանց հետ ստրկության ընթացքում այնպես վարվեցին, որ նույնիսկ ամենաահավոր երազներում հնարավոր չէր տեսնել: Մինչև օրս էլ հազարավոր եզդիներ դեռևս գտնվում են «ԻՊ»-ի ստրկության և ստրկավաճառության մեջ, իսկ Աշխարհը դեռևս լռում է…

Աշխարհին կոչ եմ անում մասնակցել հիշատակի միջոցառումներին, մոռանալ տարբեր շահերը և բոլորին ազատել ստրկությունից անկախ ազգային պատկանելությունից կամ դավանանքից»: