«Չորրորդ ինքնիշխանություն». Հակասություններ «Մաքուր Երկաթ» ընկերությունում

Իշխանական ճամբարում պտտվող խոսակցությունների համաձայն՝ երկարատև ժամանակ է, ինչ պղնձի ու մոլիբդենի արդյունաբերության մեջ հայտնի «Մաքուր Երկաթ» ընկերությունում հակասություններ են ծագել: Վերջին շրջանում հատկապես բախվել են սույն ընկերության բաժնետերերից երկուսի՝ ՀՀԿ-ական նախկին նախարար Կարեն Ճշմարիտյանի և այս տարիների ընթացքում ֆինանսական մեծ կապիտալներ կուտակած, գործարար Գենիկ Կարապետյանի միջև, որոնց հաշիվները կարծես թե խառնվել են իրար: Բանն այն է, որ Գենիկ Կարապետյանը, հատկապես 2011 թվականի ընթացքում, փորձել է ինքնուրույն խաղեր տալ «Վալլեքս Գրուպի» և արտասահմանյան մի քանի այլ կազմակերպությունների հետ՝ ըստ էության փորձելով չհրաժարվել կողմնակի եկամուտ ունենալու գաղափարից: Այս մասին իմացել է նաև Ճշմարիտյանը, որն իր հերթին Կարապետյանից հաշվետվություն է պահանջել՝ ասելով, որ այդ մասին ինքը տեղյակ կպահի նաև իրենց հիմնական բաժնետիրոջը, որն այս օրերին գործնական այցով գտնվում է արտերկրում: «ՉԻ»-ն ավելացնում է նաև, որ «Մաքուր Երկաթ» ընկերության հետ կապված ոչ պակաս հետաքրքրություններ ունի նաև Քաջարանի պղնձամոլիբդենային գործարանի տնօրեն Մաքսիմ Հակոբյանը, ում հետ Կարապետյանը երկար տարիների աշխատանքային փորձ ունի: Թե ինչ ընթացք կստանան այս խոսակցությունները, և եղած հակասությունն ինչ հանգուցալուծում կստանա՝ թերթը կտեղեկացնի հաջորդիվ: