Հայաստանը մեր՝ աղքատ ու գործազուրկ

Բա չիմացա՞ք, մենք հաղթո’ղ ենք: Այո’, հաղթող` միանգամից երկու անվանակարգում՝ աղքատություն և գործազրկություն:

Ասեմ ավելին՝ տարածաշրջանում անվիճելի առաջատարն եք, որ գրկել ենք ծանր քար հիշեցնող այս բացասական գործոնները և օր օրի անդառնալիորեն խրվում ենք ճահճի մեջ, խրվում ու խրվում…

Հիմա՝ կետ առ կետ

Պաշտոնական տվյալների համաձայն` Հայաստանում աղքատ է բնակչության 30% տոկոսը, մինչդեռ մեր թշնամի երկրում՝ Ադրբեջանում ՝ 6 տոկոս է, Վրաստանում՝ 14.8 տոկոս, իսկ Ռուսաստանում՝ 11.2 տոկոս:

Պատկերացրեք, եթե պաշտոնական այս թիվն է հրապարակված, ապա իրականում ինչ թվեր են ստվերում մնացել…:

Մեր հարևաններն իրենց ամենավատ երազներում անգամ այսպիսի վատ ցուցանիշ չեն կարող տեսնել, իսկ մենք՝ հայերս, ապրում ենք այդ ցուցանիշն ունեցող երկրում: Ապրում ենք բավարար չէ, մի հատ էլ՝ պատերազմի մեջ ենք` արդեն 25 տարի:

Ուղղակի հետաքրքիր է ՝ ինչպե՞ս ստացվեց, որ այս երկրների մեջ հենց մենք պետք է հայտնվեինք սոցիալ-տնտեսական նման բարդ իրադրության մեջ: Ի՞նչը մնացածը ճիշտ արեցին, իսկ մենք՝ սխալվեցինք…

Նշված երկրներից գրեթե ոչ մեկը չեն փայլում իրենց իդեալական ղեկավարներով և տեղի քաղաքացիները տարատեսակ հակասություններ ունեն երկրի իշխանավորների հետ, բայց գոնե աղքատության ցուցանիշն այնքան էլ սարսափազդու չէ:

Հայաստանը առաջատար է նաև գործազրկության թվերով

Պաշտոնապես Հայաստանում գործազուրկ են երկրի բնակչության 17.1%-ը, Ադրբեջանում՝ 5.2%, Վրաստանում՝ 13.4%, Ռուսաստանում ՝ 5.1%:

Սակայն, այս թիվն էլ վերջնական չէ:

Քաջատեղյակ ենք, որ պաշտոնական տվյալներն ու իրականությունը բնավ կապ չունեն:

Քաջատեղյակ ենք, որ բացառապես աշխատանքային գործակալություններում գրանցվածների տվյալները վերցնել և միացնելով չենք կարող խոսել ամբողջական պատկերի մասի…

Այս թվերին նայելուց հետո հասկանում ես, որ Հայաստանի բնակչությունը ոչ թե ապրում, այլ՝ գոյատևում ու տառապում է սեփական երկրում: Ոչ պաշտոնական տվյալներով մենք ունենք ոչ թե՝ 30% աղքատություն, այլ՝ մոտ 70%: 

Մեր երկրում միայն պաշտոնյաններն են ապրում ու բարգավաճում, իսկ ժողովուրդը գլխավորում է տարածաշրջանի աղքատների ու գործազուրկների ցուցակները:

Անի Սահակյան