Ոստիկանությունը պատրաստակամ է համագործակցել Մարդու իրավունքների պաշտպանի հետ

ՀՀ Ոստիկանության մամլո ծառայությունը հաղորդագրություն է տարածել, որում մասնավորապես ասված է.

«ՀՀ ոստիկանությունը ողջունում է ՀՀ մարդու իրավունքերի պաշտպանի նախաձեռնությունը, և հավատարիմ մնալով իր որդեգրած գործելակերպին՝ կրկին հաստատում է, որ այսուհետ ևս շարունակելու է միասնական չափանիշների կիրառմամբ ապահովել հավաքների մասնակիցների և մյուս քաղաքացիների իրավունքների ու օրինական շահերի պաշտպանությունը: Նախկինում ՀՀ ոստիկանությունը բազմիցս հանդես է եկել անձի իրավունքների և հիմնարար ազատությունների իրացմանը վերաբերող խնդիրների կապակցությամբ շահագրգիռ կառույցների հետ քննարկումներ անցկացնելու նախաձեռնություններով և հետևաբար բարձր է գնահատում ՀՀ մարդու իրավունքների պաշտպանի՝ որպես սահմանադրական ինստիտուտի հետ համատեղ արդյունավետ լուծումներ գտնելու հարցում հայտնած պատրաստակամությունը»:

Հիշեցնենք, որ երեկ Մարդու իրավուքնների պատպան Կարեն Անդրեասյանը համագործակցության առաջարկ է հղել Ոստիկանությանը, որտեղ մտահոգություն հայտնելով Մաշտոցի պուրակում անցկացված հավաքների ընթացքում ծագած խնդիրների, Կենտրոնական ընտրական հանձնաժողովի դիմաց հացադուլ հայտարարած Ա. Վարդանյանի գանգատների առնչությամբը, կարծիք է հայտնել, որ հավաքների անցկացման ընթացքում դեռևս հստակեցման կարիք ունեն Ոստիկանության աշխատակիցների և հավաքների կազմակերպիչների ու մասնակիցների իրավունքներն ու պարտականությունները: