Հնարավոր է համաներում չհայտարարվի. Հանրային խորհուրդը քննարկում է նախագահին դիմել «Սասնա Ծռեր»-ին ներում շնորհելու խնդրանքով

Սեպտեմբերի 21-ին լրանում է անկախության 25-ամյակը, որի առթիվ լուրեր էին շրջանառվում, թե Սերժ Սարգսյանը համաներում կհայտարարի: Նշենք, որ արդեն երեք տարի է Սերժ Սարգսյանը ոչ մի անգամ համաներում չի հայտարարել:

ԼՈւՐԵՐ.com-ին տեղեկություններ են հասել այն մասին, որ այս անգամ ևս հնարավոր է համաներում չհայտարարվի:

Այսօր, օրինակ, Հանրային խորհրդում քննարկվել է հնարավոր համաներման մասին առաջարկով դիմել նախագահին, քննարկման հիմնական շեշտադրումը եղել է ներել «Սասնա Ծռերի» անդամներին, սակայն ավելի քան 3 ժամ տևած բուռն քննարկման արդյունքում հանրային խորհրդում այդպես էլ չեն կողմնորոշվել՝ առաջարկով դիմել նախագահին, թե՝ ոչ:

Մեր տեղեկություններով, հանրային խորհուրդ են դիմել մի խումբ հայուհիներ՝ «Հայուհի» կոմիտեի անունից՝ Հայաստանից և Սփյուռքից՝ խնդրելով միջամտել այս հարցում և դիմել նախագահին խնդրանքով՝ հայտարարել համաներման մասին, հատուկ կետով նաև՝ «Սասնա Ծռերի»-ն ներել:

Քննարկման ընթացքում տեսակետները ծայրահեղ տարբեր են եղել, մասնակիցների մի մասը համարել է, որ «Սասնա Ծռերի»-ի անդամները տեռորիստներ են և պետք է օրենքով սահմանված կարգով պատասխանատվության ենթարկվեն, իսկ մյուս մասն էլ հակված է այն տեսակետին, որ պետք է նրանց ազատ արձակել և ոչ թե նրանց հետ հաշիվներ մաքրել, այլ խնդիրներին լուծում տալ՝ հետագայում նմանատիպ դեպքերից խուսափելու համար: