ՀՀ գլխավոր դատախազի թեկնածուն չի շտապում մեկնաբանել զինված խմբի անդամների նկատմամբ համաներում կիրառելու հավանականությունը

ՀՀ գլխավոր դատախազի թեկնածու Արթուր Դավթյանը չի շտապում պատասխանել հարցին՝ համաներումը կկիրառվի՞ ՀՀ ոստիկանության պարեկապահակային ծառայության գունդը գրաված զինված խմբի անդամների նկատմամբ, թե՞ ոչ: Ազգային ժողովում լրագրողների հետ զրույցում Արթուր Դավթյանը նշեց, որ այս պահին համաներման ակտ չկա, որպեսզի հնարավոր լինի այդ հարցը պարզաբանել: «Այն հոդվածները, որոնցով առաջադրվել են մեղադրանքներ և քրեական գործ է հարուցվել, այո, դրանք ունեն խրախուսական նորմեր, սակայն թե որքանով խրախուսական նորմերով նախատեսված փաստերը առկա են, դա ցույց կտա քննությունը: Այսինքն, քննությամբ պետք է հիմնավորվի՝ արդյոք մենք ունեցե՞լ ենք պատանդների կամովի ազատում և շենք-շինությունների հանձնում, թե՞ ոչ: Վերջնական իրավական գնահատականները կտրվեն քննության արդյունքներով»,- պարզաբանեց ՀՀ գլխավոր դատախազի թեկնածուն:

ՊՊԾ գնդի գրավման ընթացքում երեք ոստիկանների սպանության դեպքերով հարուցված քրեական գործերի քննությունը շատ օպերատիվ կերպով իրականացվում է: «Ես չեմ կարող նախաքննության գաղտնիք համարվող տեղեկություններ հրապարակել, բայց ունենք որոշակի արդյունքներ: Երբ օրենքով սահմանված կարգով կհավաքվեն բավարար ապացույցներ, կոնկրետ մեղավոր անձանց մեղադրանքներ կառաջադրվեն և այդ մասին անպայման կիրազեկվեք»,- նշեց Դավթյանը:

Հարցին՝ զինված խմբի գործողությունները ահաբեկչություն համարո՞ւմ է, ՀՀ գլխավոր դատախազի թեկնածուն պատասխանեց. «Ես այդ հարցին կպատասխանեմ մասնագիտական դաշտում: Իրականացվում է նախաքննություն: Դեպքից մոտ երկու ամիս է անցել, դեռևս նախաքննությունն ավարտված չէ: Նախաքննության արդյունքներով իրականացվում է լայնածավալ, օպերատիվ քննություն, սակայն պարզաբանման ենթակա հանգամանքների շրջանակն է բավականին մեծ: Քննության արդյունքներով ես իրավական ավելի հստակ գնահատականներ կարող եմ տալ: Այս պահին կարող եմ ասել, որ մենք քրեաիրավական գնահատական որպես ահաբեկչություն չունենք տված: Քննության հետագան արդեն ցույց կտա»:

Անդրադառնալով զինված խմբի անդամներին հաց տարած Արթուր Սարգսյանի գործին՝ Արթուր Դավթյանն ընդգծեց, որ նրան այս պահին մեղադրանք է առաջադրվել զինված խմբի անդամներին օժանդակելու համար: «Նրա մեղադրանքի նկարագրությունը չի արտացոլվում հաց տանելով: Նա օրեր շարունակ գտնվել է զինված խմբի անդամների հետ և տեղում իր համապատասխան գործունեությամբ ապահովել է զինված խմբի արդյունավետ գործունեության իրականացումը»,- մանրամասնեց Արթուր Դավթյանը: