Անիմաստ կարգախոսների շքահանդես Գյումրիում

Հոկտեմբերի 2-ին մեր երկրի երկրորդ քաղաքում՝ Գյումրիում, սպասվում  են քաղաքապետի ընտրություններ: Մենք առանձնացրել ենք քաղաքապետի հայտ ներկայացրած թեկնածուների որդեգրած կարգախոսները, որոնցով 30 օր շարունակ նրանք կներկայանան էլեկտորատին: 

Կարգախոսի ընտրությունը բավականին բարդ տեխնոլոգիա է, դրանք գործում են ընտրարշավի ողջ ընթացքում և ինչ-որ չափով սահմանում թեկնածուների նախընտրական գործունեությունը: Թեկնածուն պետք է հաշվի առնի, որ ընտրված կարգախոսը հակիրճ ներկայացնում է նախընտրական իր ծրագիրը, խոսում է իր ընկալումների և նպատակների մասին, ավելին՝ ճիշտ ընտրված կարգախոսը կարող է անգամ թեկնածուից, այսպես ասած, «երկար ապրել»: 

Մենք առանձնացրել ենք Գյումրու ընտրություններում քաղաքապետի հայտ ներկայացրած անձանց նախընտրական կարգախոսները, որոնք մեր գնահատմամբ թույլ են ասելիքի իմաստով, տկար՝ ազդեցության ուժի առումով:

Բալասանյան դաշինք

«Ժամանակին վճարված աշխատավարձեր». այս կարգախոսը տեսնելուց հետո միակ հարցը, որ առաջանում է, սա է՝ և՞...

Բալասանյանին նախ պետք է հիշեցնել, որ Գյումրիում դեռ աշխատանք գտնելու խնդիր կա, երկրորդ՝ հարցնել, արդյոք կարգախոսը վերաբերում է միայն քաղաքապետարանի և Գյումրու գարեջրի գործարանի աշխատակիցների՞ն:

Մի բան հաստատ է, Բալասանյանին ընտրություններում չի օգնի ոչ այս կարգախոսը և ոչ էլ այն խելացի լուսանկարը, որով լցվել է Գյումրին: 

Գործնականում սովորաբար գործող պաշտոնյաներն արված գործը շարունակելու, համատեղ աշխատելու կամ նոր ձեռքբերման և գործն ավարտին հասցնելու հայտով են հանդես գալիս, սակայն Բալասանյանը նեղացրել է իր կարգախոսի փիլիսոփայությունը՝ իր առաջ դնելով քաղաքապետարանի ենթակայության տակ գտնվող ստորաբաժանումների աշխատակիցների աշխատավարձերի ժամանակին վճարման խնդիր: Բալասանյանի կարգախոսը կարող էր լինել նաև «Մտածենք մեր (քաղաքապետարանի աշխատակիցների) մասին»:

ՀԱԿ

«Ընտրիր փոփոխությունը». ծայրահեղ վերացական այս կարգախոսը դժվար կարողանա ՀԱԿ-ին օգնել այս ընտրություններում: Գուցե սա աշխատեր զարգացած ու կայուն ինչ-որ քաղաքում, սակայն ոչ Գյումրիում, որտեղ տեղական խնդիրները բազմաթիվ են, և կարգախոսը պետք է կպնի ընտրողի հույզերին:

«ԲՀԿ», «Ալյանս»

«Սկսենք Գյումրիից»: Ինչ-որ բան ասելու կարիք կա՞: Պարզապես զավեշտ, մրցել նույն կարգախոսով, ֆանտազիան ի՞նչ է, որ չունեք: 

ՀՅԴ

«Մեր Գյումրին, ԲԱՐԵԿԵՑԻԿ, ՈՒԺԵՂ ԵՎ ՀՈԳԵՎՈՐ». այս կարգախոսում հստակ անելիք և շեշտադրում է երևում: Այսինքն՝ թեկնածուն նպատակ է դրել համոզելու ընտրողին, որ Գյումրին դառնալու է բարեկեցիկ ու ուժեղ, բայց թե ինչ նատակ է ունեցել հոգևորի շեշտադրմամբ, դժվար է ասել, հավանաբար կարգախոսի ընտրության ժամանակ ոգևորված է եղել Հռոմի պապի՝ Գյումրի այցելությամբ և որոշել է ոչ միայն բարձրացնել սոցիալական խնդիրների հարցը, այլ նաև խաղալ քաղաքացու հոգևոր զգայարանների հետ: 

ԳԱԼԱ

«Մաքուր ձեռքերով՝ քաղաքականություն»: Ընդդիմադիր դիրքերից հանդես եկող այս կուսակցությունը կենտրոնացել է այն հանգամանքի վրա, որ իրենց կուսակցությունում քաղաքական անբասիր անցյալով մարդիկ են հավաքված, բայց արդյո՞ք դա ամուր հիմք է՝ համոզելու քաղաքացուն, որ իրենց ընտրելով, ունեցած սոցիալական խնդիրները կլուծվեն:

Մի խոսքով՝ վատ չէ, որ մաքուր ձեռքերով են փորձում քաղաքականություն մտնել, սակայն այս կարգախոսը Գյումրիում դժվար թե աշխատի: 

 «Համախմբում»

«Համախմբում»-ի միտումը դրական ասոցիացիաներ է առաջացնում մարդկանց մոտ, կարելի է ասել, քիչ թե շատ հաջողված կարգախոսն է սա՝ «Համախմբում՝ հանուն Գյումրիի», թեպետ այս կուսակցությունը ևս մեկ կարգախոս ունի. «Ոչ դրածոներին, ոչ ընտրակեղծիքներին, այո համախմբմանը», այս կարգախոսի փիլիսոփայության հիմքում ընկած է արդար ընտրությունների անցկացումը, մերժումը՝ «դրածո» քաղաքապետին և պայքար տանել գյումրեցիների հետ համատեղ ուժերով Գյումրու զարգացման համար:

«Նոր դեմքեր, նոր Գյումրի, նոր կյանք»: Նոր դեմքերը, որպես կանոն, կասկած են առաջացնում՝ իրենց հետ բերելով վստահության և փորձի պակասի խնդիր: Այս թիմին՝ ընտրություններին մասնակցությունը ճանաչում ձեռք բերելու հարց կարող է լուծել և այս փուլում «Նոր կյանք» ապահովելու խոստումը բավականին հավակնոտ է:

Նելլի Ավետիսյան