Պատմական պահ՝ Ազգային ժողովում. Ստորագրված ընտրական ցուցակները կհրապարակվեն

Քիչ առաջ տեղի ունեցավ «4+4+4» ձևաչափով  աշխատանքային խմբի կողմից ՀՀ ընտրական գործընթացների կազմակերպման և անցկացման մասին համաձայնագրի վերջնական կազման և ստորագրման աշխատանքային նիստը:

ԼՈՒՐԵՐ.com-ի թղթակցի տեղեկացմամբ՝ ՀԱԿ պատգամավոր Լևոն Զուրաբյանի խոսքով՝ քաղաքացիական հասարակությունն այս ֆորմատում բավականին լուրջ աշխատանք է իրականացրել: Պատգամավորը տեղեկացրեց, որ միջազգային դոնորների կողմից կլուծվեն ֆինանսական խնդիրները: «Սա  երաշխիք չէ մաքուր, ազատ, արդար ընտրությունների համար, մենք դեռ երկար պետք է պայքարենք, բայց սա լուրջ ֆունդամենտ է, որ այդ իրողությունը պետք է կառուցենք: Պետք է պայքարենք, այդ թվում՝ կարևոր է քաղաքացիական հասարակության դերը: Հիմքը դրված է՝ առաջ դեպի ազատ և մաքուր ընտրություններ»,-ասաց Լևոն Զուրաբյանը:

ՀՀԿ պատգամավոր Հովհաննես Սահակյանն ընդդիմադիր խոսքը մի փոքր հումորի ենթարկեց. «փաստորեն ոչ միայն խոսքի տոնն է փոխվել, նաև կարգախոսն է փոխվել՝ «Առաջ Հայաստան»»: Հիշեցնենք՝ այս կարգախոսը ժամանակին ՀՀԿ-ի նախընտրական կարգախոսն է եղել:

Սահակյանի խոսքից հետո Նաիրա Զոհրաբյանն էլ իր կուսակցության կարգախոսն առաջ քաշեց. «դե ուրեմն առաջ դեպի «Բարգավաճ Հայաստան»», Մհեր Շահգելդյանն էլ՝ դե որ այդպես է, ուրեմն՝ «Վերածնված Հայաստան»»:

Նիստին ներկա Կառավարության աշխատակազմի ղեկավար-նախարար Դավիթ Հարությունյանը շնորհակալություն հայտնեց Լևոն Զուրաբյանին՝ գործը գլուխ բերելու համար, նշեց, որ սա աննախադեպ երևույթ է և լավատեսորեն է նայում այս համագործակցությանը:

Նշենք, որ իշխանությունների և ընդդիմադիր քաղաքական ուժերի միջև ընտրական գործընթացների վերահսկման մեխանիզմների ներդրման վերաբերյալ ստորագրված փաստաթղթով նախատեսվում է հրապարակել ստորագրված ընտրական ցուցակները:

Ստորագրման վերջում Լևոն Զուրաբյանն ասաց. «13 տարի մի բանի համար պայքարել ես, բա պատմական պահ է, բա ինչ է»: