Նախագահ Սերժ Սարգսյանը շնորհավորել է Ռուսաստանի կառավարության նախագահ Դմիտրի Մեդվեդևին՝ ծննդյան օրվա առթիվ

Նախագահ Սերժ Սարգսյանն այսօր շնորհավորական ուղերձ է հղել Ռուսաստանի Դաշնության կառավարության նախագահ Դմիտրի Մեդվեդևին՝ ծննդյան օրվա առթիվ: Այս մասին տեղեկացրին Նախագահի աշխատակազմից: 

«Հարգելի՛ Դմիտրի Անատոլիի,

Ընդունեք անկեղծ շնորհավորանքներ Ձեր ծննդյան օրվա առթիվ:

Պետական և քաղաքական գործունեության հարուստ փորձը, դրված նպատակներին հասնելու կարողությունը՝ ի շահ Ռուսաստանի Դաշնության սոցիալ-տնտեսական զարգացման, Ձեզ արժանացրել է վաստակած հարգանքի հայրենակիցների շրջանում և արտերկրում:

Անվիճելի է Ձեր անձնական ներդրումը Հայաստանի և Ռուսաստանի միջև դաշնակցային հարաբերությունների ամրապնդման գործում: Անկեղծորեն բարձր եմ գնահատում մեր միջև հաստատված փոխըմբռնումն ու վստահությունը:

Վստահ եմ, որ մեր երկրների բազմակողմանի համագործակցության ներկապնակի հարստացմանը, ինչպես նաև առևտրատնտեսական, ներդրումային և մշակութային-հումանիտար ոլորտներում ռազմավարական պայմանավորվածությունների իրականցմանն ուղղված հետագա համատեղ ջանքերն ու նոր հեռանկարային ծրագրերի մշակումն ամբողջությամբ բխում են մեր պետությունների ժողովուրդների բարեկամության հետագա ամրապնդման շահերից:

Հարգելի՛ Դմիտրի Անատոլիի,

Մաղթում եմ Ձեզ քաջառողջություն, երջանկություն և նորանոր հաջողություններ»,-ասված է ՀՀ Նախագահի շնորհավորական ուղերձում: