Գարեգին Նժդեհի 133-ամյակին նվիրված հեծանվաարշավն անցավ Գեղարքունիքի մարզի քաղաքներով

Մեծ հայրենասեր, ականավոր զորավար ու ազգային-ազատագրական շարժման գործիչ Գարեգին Նժդեհի ծննդյան 133-ամյակին եւ Հայաստանի Հանրապետության անկախության 25-րդ տարեդարձին ընդառաջ Երեւան քաղաքի Շենգավիթ վարչական շրջանից մեկնարկել է հոբելյանական հեծանվաարշավ՝ դեպի Հայաստանի տարբեր մարզեր եւ քաղաքներ: Սեպտեմբերի 13-14-ին այն անցավ Գեղարքունիքի մարզի Սեւան, Գավառ եւ Մարտունի քաղաքներով:

Ինչպես տեղեկացրեց հեծանվաարշավի խմբի ղեկավար Մարտին Շարբաթյանը, սեպտեմբերի 8-ից մեկնարկած նախաձեռնության հերթական 6-րդ փուլի ընթացքում հեծանվորդները, Հայաստանի տարբեր բնակավայրեր այցելելուց հետո, Գոշավանքից ուղեւորվեցին դեպի Սեւան, ապա՝ Գավառ եւ Մարտունի: Այնուհետեւ մի շարք քաղաքներից հետո նրանք պետք է հասնեն Ստեփանակերտ, ապա կլինեն Սյունիքի մարզում, որտեղ կայցելեն Գարեգին Նժդեհի շիրմին: Արշավի 14-րդ օրը հեծանվորդները կեզրափակեն Մայր աթոռում՝ մոմավառությամբ: Արշավախմբի 30 անդամներից 20-ը երիտասարդ հեծանվորդներ են, իսկ 10-ն իրականացնում են տեխնիկական սպասարկում: Արշավախմբին Գավառում դիմավորեցին եւ ճանապարհեցին քաղաքի մարզադպրոցի սաները: Վերջիններս հնարավորություն ունեցան անմիջական շփման միջոցով ծանոթանալ Հայաստանի եւ արտերկրի հեծանվավազքի տարբեր առաջնություններում աչքի ընկած մարզիկների հետ, ովքեր ընդգրկված են արշավախմբի կազմում: «Մենք մեր կանգառների ընթացքում մեր զրուցակիցներին հաղորդակից ենք դարձնում մեծն Նժդեհի գաղափարներին, Հայաստանի անկա խության տարիների ձեռքբերումներին: Մենք ուզում են քաջալերել մեր հայրենակիցներին նժդեհյան ուսմունքով ու հայրենապաշտությամբ, Հայաստանի ու Արցախի անկախ պետությունների անշրջելի նվաճումներով: Մենք համարում ենք մեզ ավետաբեր ծիծեռնակներ, որ բերում են գարնան ու բարօրության լուրը»,- նշեց արշավախմբի ղեկավար Մարտին Շարբաթյանը:

Խոսրով Խլղաթյան