Հզոր երկրաշարժ է տեղի ունեցել Չիլիի ափերին

Մայիսի 17-ի երեկոյան 6.7 մագնիտուդով երկրաշարժ է տեղի ունեցել Չիլիի հարավի ծովափնյա հատվածում։

ԱՄՆ-ի օվկիանոսային եւ մթնոլորտային հետազոտությունների ազգային վարչությունից տեղեկանում ենք, որ ստորերկրյա ցնցումների էպիկենտրոնը գտնվել է Խաղաղ օվկիանոսում՝ ափից մոտ 400 կմ հեռավորության վրա, 10 կմ խորությամբ: Զոհերի եւ ավերածությունների մասին տեղեկություններ չկան:

Չիլին հայտնի է սեյսմիկ բարձր ակտիվությամբ, սակայն նոսր բնակեցվածության հետևանքով երկրաշարժերի մարդկային զոհերը մեծ չեն: 2010 թվականի փետրվարի վերջին 8.8 մագնիտուդով երկրաշարժի եւ նրան հաջորդած ցունամիի հետեւանքով զոհվել էր ավելի քան 500 մարդ, մինչդեռ խիտ բնակեցված շրջաններում նման երկրաշարժը կարող էր հարյուր հազարավոր մարդկանց մահվան պատճառ հանդիսանալ։ Հիշեցնենք, որ 1988 թվականի Սպիտակի երկրաշարժը եղել է ընդամենը 6.9 մագնիտուդ հզորության։