Մերկելը հիասթափված է Բեռլինի խորհրդարանի ընտրություններում իր կուսակցության արդյունքներից

Մերկելն անբավարար է համարել Բեռլինի խորհրդարանի ընտրություններում իր կուսակցության ձեռք բերած արդյունքները: Այդ մասին սեպտեմբերի 19-ին հայտարարել է Գերմանիայի կանցլեր Անգելա Մերկելը՝ մեկնաբանելով Բեռլինի երկրամասային խորհրդարանի ընտրությ ունների արդյունքները, որտեղ նրա Քրիստոնեադեմոկրատական միությունը (ՔԴՄ) արաձանագրել է ռեկորդային ցածր ցուցանիշ՝ 17,6 տոկոս, եւ դուրս մնացել մայրաքաղաքի կոալիցիոն կառավարությունից: «Արդյունքը հիասթափեցնում է եւ անբավարար է»,-ասել է նա:

Մերկելի խոսքով՝ դրա մեղավորը նաեւ միգրացիոն քաղաքականությունն է: Սակայն կանցլերը համոզված է, թե խնդիրն ավելի շուտ այն է, որ Գերմանիայի կառավարության քաղաքականությունը վատ է պարզաբանվում բնակչությանը: «Այդ ուղղությամբ ես այսուհետեւ էլ կաշխատեմ»,-հավաստիացրել է նա:

Անգելա Մերկելը նաեւ նշել է, որ առայժմ պատրաստ չէ ասել՝ ինքը կրկին հավակելու է արդյոք կանցլերի պաշտոնին: «Այսօր այդ օրը դեռ չի եկել»,-ասել է նա՝ պատասխանելով համապատասխան հարցին:

Բունդեսթագի ընտրությունները տեղի են ունենալու 2017 թվականին: Կանցլերի պաշտոնի թեկնածուն պետք է որոշվի ՔԴՄ-ի հերթական համագումարում, որը, ինչպես սպասվում է, կգումարվի տարվա վերջին, հաղորդել է ՏԱՍՍ-ը: