Ֆրանսիան կրճատում է կառավարության աշխատավարձը 30%-ով

Նոր, սոցիալիստական կառավարությունը հինգշաբթի օրն անցել է աշխատանքի՝ սկսելով իր գործունեությունը սեփական աշխատավարձի կրճատմամբ 30%-ով, ինչը երկրի ֆինանսական միջոցների խնայողությանը և բանական օգտագործմանն ուղված ընդհանուր պլանի մի մասն է։

Աշխատավարձի կրճատումը հավանության է արժանացել կառավարության առաջին իսկ նիստում։ Հարկ է նշել, որ դա տեղի է ունեցել այն բանից հետո, երբ Գերմանիայի կառավարությունն ավելացրել է նախարարների և անձամբ Մերկելի աշխատավարձերը 5.7%-ով։ Վերջինիս աշխատավարձն այժմ գերազանցում է Ֆրանսիայի նոր նախագահ Ֆրանսուա Օլանդի հաստիքը։

Դիտորդները գտնում են, որ այսպիսով Օլանդը փորձում է դիստանցավորվել իր նախորդից՝ Սարկոզիից, որի աշխատավարձը 2007 թվականին աճելով հասել էր գրեթե տարեկան 300,000 դոլարի։

Այս որոշումը ուժի մեջ է մտել անմիջապես։ Կառավարության հայտարարության մեջ նշվում է, որ նախարարների դրույքը կազմելու է ամսական 9940 եվրո այժմյան 14200-ի փոխարեն, իսկ նախագահ Օլանդի և վարչապետ Ժան-Մարկ Էյրոյի աշխատավարձերը կկազմեն 14910 եվրո՝ 21300 եվրո-ի փոխարեն։

Այս որոշումը կառավարության ընդունած առաջին որոշումներից մեկն էր։ Մյուսը վերաբերում էր նախարարների կաբինետի վարքի կոդեքսին՝ միտված շահերի կոնֆլիկտների վերացմանը։

«Մենք այստեղ ենք եկել ոչ միայն նրա համար, որ կառավարենք երկիրը, այլև որպեսզի այն նորոգենք, հաղթահարենք առանձնաշնորհները և լավացնենք ֆրանսիական ժողովրդի կյանքը», - հայտարարել է կանանց իրավունքների հարցերով նախարար Նաջաթ Վալլո-Բելքասեմը։

Այսպիսով՝ նախագահ Օլանդը կատարել է իր նախընտրական խոստումներից մեկը։ «Սա ձախ կառավարություն է, որը հետևում է հավասարության սկզբունքին, և դա պատմական իրադարձություն է», - հայտարարել է նախագահի նախկին թեկնածու Սեգոլին Ռոյալը։

Նախագահ Օլանդը երեկոյան մեկնելու է Բարաք Օբամայի հետ հանդիպման, այնուհետև մասնակցելու է Մեծ Ութնյակի և ՆԱՏՕ-ի գագաթնաժողովներին։