«Մարտական խաչ»-ի արժանացած զինծառայողը պատրաստ է անհրաժեշտության դեպքում նորից դիրքեր գնալու

Ապրիլյան պատերազմի մասնակից, հակառակորդի երկու տանկ խոցած Ռաֆիկ Կրպեյանը վստահ է՝ եթե անհրաժեշտություն լինի, նորից է գնալու դիրքեր: Նա Նախագահ Սերժ Սարգսյանի կողմից ՀՀ անկախության 25-րդ տարեդարձի առիթով պարգեւատրվել է «Մարտական խաչ» 2-րդ աստիճանի շքանշանով:

«Հակառակորդի տանկերը նկատելուց հետո տեղեկացրել եմ անձնակազմին, եւ միասին ենք խոցել: Այդ պահին մտածում էի, որ դա անում եմ հանուն իմ ընտանիքի, ընկերների ու ժողովրդի, հանուն նրա, որ հակառակորդը փախչում էր, իսկ մենք առաջ էինք գնում: Պարզապես այնտեղ, այդ պահին գիտակցում ես, որ ամեն ինչ իրական է եւ կարող ես մահանալ գնդակից»,-ասաց նախկին զինծառայողը:

Նա նշեց, որ շատ հիշողություններ են կապված պատերազմի օրերի, զոհված ընկերների հետ, սակայն խոսել այդ մասին չցանկացավ: Պարզապես ասաց, որ սահմանը հիմա ապահով ձեռքերում է, այնտեղ են իր մյուս ընկերները: «Նրանց հետ կապը միշտ ենք պահպանում: Վերջերս գնացի Թալիշ, ընկերներիս տեսա. ասում են, որ ամեն ինչ լավ է»,- ասաց նա:

20-ամյա Ռաֆիկ Կրպեյանը սովորում է Ֆիզիկական կուլտուրայի պետական ինստիտուտում: Նա վստահորեն նշեց, որ եթե նորից կարիք լինի, կթողնի ուսումը եւ կգնա սահման:

Հայրենիքի սահմանները պաշտպանելիս ցուցաբերած խիզախության համար «Մարտական խաչ» 1-ին աստիճանի շքանշաններով են պարգեւատրվել նաեւ գնդապետ Գրիգոր Սահակյանը եւ փոխգնդապետ Կարեն Ջալավյանը, իսկ «Մարտական խաչ» 2-րդ աստիճանի շքանշանով՝ գնդապետ Էրիկ Մկրտումյանը: Արցախի հերոս Արկադի Տեր-Թադեւոսյանին շնորհվել է Սուրբ Վարդան Մամիկոնյանի շքանշան: Իսկ կրտսեր սերժանտ Գեւորգ Հարությունյանը, ով 2016 թվականի օգոստոսի 2-ին զոհվել էր ականի պայթյունից մարտական դիրքերում վիրավոր ընկերոջն օգնելիս, հետմահու պարգեւատրվել է «Արիության հ ամար» մեդալով: