ՀՀ անկախության 25-ամյակին նվիրված երկու նոր նամականիշ է շրջանառության մեջ դրվել

«Հայփոստ Թրասթ Մենեջմենթ» ՓԲԸ-ն 2016 թվականի սեպտեմբերի 21-ին շրջանառության մեջ դրեց 2 նամականիշ՝ նվիրված Հայաստանի Հանրապետության անկախության 25-ամյակին: Ինչպես տեղեկացրին «Հայփոստ» ՓԲԸ-ից, մարման պաշտոնական արարողությունը տեղի ունեցավ ՀՀ Նախագահի նստավայրում: Մարումն իրականացրեց Հայաստանի Հանրապետության նախագահ Սերժ Սարգսյանը:

Նամականիշերն ունեն 200 և 300 ՀՀ դրամ անվանական արժեք, տպվել են Ֆրանսիայում՝ Կարտոր տպարանում:

200 դրամ անվանական արժեքով նամականիշի վրա պատկերված են «25 ամյակ» և «ԱՆԿԱԽՈՒԹՅՈՒՆ» գրառումները, ինչպես նաև Հայաստանի Հանրապետության ծածանվող եռագույն դրոշը կապույտ երկնքի խորապատկերին՝ խորհրդանշելով երկրի 25-ամյա անկախությունը և պետականությունը: Չափսերն են՝ 40,0 x 30,0 մմ, տպաքանակը՝ 50,000:

300 դրամ անվանական արժեքով նամականիշի վրա պատկերված է «25 ամյակ» գրառումը, որը կազմված է Երևան քաղաքի պատկերների կոլլաժի տեսքով՝ ցույց տալով նորանկախ պետության զարգացումը այս 25 տարիների ընթացքում: Չափսերն են՝ 30,0 x 40,0 մմ, տպաքանակը՝ 50,000:

Նամականիշերի դիզայնի հեղինակներն են «Հայփոստ Թրասթ Մենեջմենթ» ՓԲԸ կառավարող տնօրեն Խուան Պաբլո Գեչիջյանը և «Հայփոստ» ՓԲԸ-ի դիզայներներ Վահագն Մկրտչյանը և Դավիթ Դովլաթյանը: