Արամ Մանուկյանի տունը՝ քանդված, ավերված և աղբանոցի վերածված (լուսանկարներ)

Արամի 9 հասցեում գտնվող՝ փլատակների վերածված շենքերից մեկի վահանակը հուշում է՝ «Այստեղ ապրել է Արամ Մանուկյանը»:

Այսօր այս շենքը կարող էր լինել բարեկարգված և հատուկ պահպանման տարածք, ինչու ոչ՝ նաև հետաքրքրեր զբոսաշրջիկներին, հատկապես՝ սփյուռքահայերին:

Երևանում՝ այն տանը, որտեղ 1917-1919 թվականներին ապրել է «Հայ Յեղափոխական Դաշնակցություն» կուսակցության անդամ, պետական, հասարակական գործիչ, ներքին գործերի նախարար Արամ Մանուկյանը, ծառեր են աճում, փլատակներ են, և հարմար կացարան է դարձել թափառական շների համար:

Թե ինչ ճակատագիր է սպասվում Հայաստանի Առաջին Հանրապետության համահիմնադիր Արամ Մանուկյանի տանը՝ նախատեսված է այն վերանորոգել, քանդել, վաճառել, նվիրաբերել կամ այլ գործողություն իրականացնել, ԼՈւՐԵՐ.com-ի այս հարցերին ի պատասխան՝ Երևան քաղաքի գլխավոր ճարտարապետի աշխատակազմից գրավոր պատասխանել են.

«Երևան քաղաքի Գլխավոր պողոտայի՝ Աբովյան, Բուզանդի, Կողբացու և Արամի փողոցներով պարփակված տարածքը՝ ներառյալ Արամի փողոց հ.9 շենքն իր զբաղեցրած հողատարածքով, ճանաչվել է բացառիկ գերակա հանրային շահ: Տարածքը ձեռք բերող ընկերության կողմից Արամի հ.9 շենքը, որը հանդիսացել է բնակելի շենք և ունեցել է մեկ տասնյակից ավելի բնակարաններ, օրենքով սահմանված կարգով իրացվել է:

Արամի հ.9 շենքը և վերը նշված տարածքում առկա հուշարձան-շենքերը պահպանվելու և վերակառուցվելու են իրենց իսկ տեղերում: Վերակառուցման բոլոր աշխատանքները կատարվելու են «Պատմության և մշակույթի անշարժ հուշարձանների ու պատմական միջավայրի պահպանության և օգտագործման մասին» ՀՀ օրենքին ու ՀՀ կառավարության 2002թ. ապրիլի 20-ի հ.438 որոշմանը համապատասխան:

Հարկ ենք համարում նշել, որ կառավարության որոշումներում և դրանից բխող պայմանագրերում քննարկվող շենքը՝ որպես Արամ Մանուկյանի տուն-թանգարան, վերականգնելու որևէ դրույթ ամրագրված չէ»:

Թե, երբ վերջապես կբարեկարգվի պատմամշակութային արժեք ներկայացնող այս շենքը, և ինչ տեսք այն ձեռք կբերի, պատասխանից անորոշ է մնում: Մնում է միայն հույս ունենալ, որ աղբանոցի վերածված այս տարածքը մի օր կսկսենք գնահատել և վերակառուցել: Եվ տարատեսակ լոգոտիպեր ստեղծելու համար նախատեսված հազարավոր եվրոներից որոշ մասն էլ բաժին կհասնի իրական արժեքներին, չնայած՝ դրա համար որոշակի մտածողություն է պետք, այնպես չէ՞: 

 Ն. Ա.