Ամոթից գետինը մտանք, քանի որ Վրաստանի վերաբերյալ ավելի լավ էինք զեկուցում, քան ՀՀ-ի. Հրանտ Բագրատյան

ԱԺ-ում Տեղական տուրքերի և վճարների մասին օրենքում փոփոխությունների նախագծի քննարկման ժամանակ ՀԱԿ խմբակցության պատգամավոր Հրանտ Բագրատյանը հիշեցրեց, որ Բրյուսելում ՓՄՁ-ների մասին քննարկում է եղել, որտեղ կարդալով Հայաստանի զեկույցը խայտառակվել է.

«ՀՀ միջվարչությունն ասում էր, որ Հայաստանի ՀՆԱ-ի 70 տոկոսն արտադրում է ՓՄՁ-ն: Իմ զեկուցման ժամանակ 14 երկրի տվյալ տալիս եմ, բայց ասացի՝ ՀՀ-ի վերաբերյալ թիվ ունեմ, բայց չեմ հավատում: Այդ ժամանակ պրոֆեսոր Մակառեսն ասաց, որ ՀՀ-ում չունենք ՓՄՁ վիճակագրություն և մեկ տարի աշխատելով՝ մի կերպ նոր կարողացել են գնահատել ՓՄՁ ոլորտն ու, դժբախտաբար, ոչ թե ՀՆԱ-ն 70 տոկոս է, այլ 14 է: Մենք ընդհանրապես վիճակագրություն չունենք, բոլորը սովերել են թվեր նկարել, և մենք ամոթից գետինը մտանք, քանի որ Վրաստանի վերաբերյալ ավելի լավ էինք զեկուզում, քան ՀՀ-ի, քանի որ թիվ չկա: Մենք սա ներկայացրեցինք նախկին վարչապետին ու էկոնոմիկայի նախարարին, ով էլ ասաց, թե սա խայտառակություն է»,- նշեց Բագրատյանը:

Ինչ վերաբերում է օրենքի փոփոխությանը, Հրանտ Բագրատյանն ասաց, որ այս երկրում տարեկան 5 մլրդ դոլարի առևտուր է լինում, այն կարող եք տեղավորել 15 մոլի մեջ, բայց այդ դեպքում զարգացում չեք ստանա. «Եթե դա անում է միայն խոշորը, երբ փոքրը չի մասնակցում, խոշորը չի իմանում ինչ անի փողը»: