Այս կառավարությունից ոչ մի հեռանկար սպասել պետք չէ. Լևոն Զուրաբյանը՝ կենսաթոշակները բարձրացման մասին

Կառավարության հետ հարցուպատասխանի ժամանակ ՀԱԿ խմբակցության ղեկավար Լևոն Զուրաբյանը հետաքրքրվեց կենսաթոշակների ավելացումներից և հայտարարեց, որ քաղաքացիներին մտահոգում է՝ արդյոք կենսաթոշակները բարձրանալո՞ւ են, թե՞ ոչ: Պատգամավորը հիշեցրեց նաև, որ նվազագույն կենսաթոշակը կազմում է 14 հազար, իսկ միջինը՝ 30 հազար 815 դրամ, որը չի համապատասխանում սպառողական զամբյուղին և, ակնհայտ է, որ այդ գումարով մարդիկ չեն կարող ապրել:

«Թվերին, որ նայում ենք, հարց է առաջանում, թե ո՞րն է խնդիրը, որ չենք կարողանում ավելացնել կենսաթոշակներն այնքան, որպեսզի մարդիկ կարողանան նորմալ ապրել: Բյուջեի վատնումը, մսխումը, ժողովրդի լեզվով ասած՝ թալանը կազմում է մոտավորապես յոթ հարյուր միլիոն դրամ, իսկ կենսաթոշակները չեն բարձրանում»,- նկատեց պատգամավորը:

ՀՀ աշխատանքի և սոցիալական հարցերի նախարար Արտեմ Ասատրյանն իր արձագանքում նշեց, որ շուրջ 15 տոկոսով ավելացել է միջին կենսաթոշակների չափը և հավելեց.

«Կենսաթոշակների միջին չափը կազմում է շուրջ 41 հազար դրամ: Իհարկե, սա բավարար չէ, և այն խնդիրները, որ մենք այսօր ունենք, պայմանավորված է նրանով, որ մենք համարվում ենք ծերացող ազգ: Այսօր ունենալով պետբյուջեում երեսուն տոկոս ծախսեր, տեղյակ եք, թե այդ խնդիրների հետ կապված ինչ ծախսեր են կատարվում: Արվում է ամեն ինչ, որպեսզի այդ գումարից յուրաքանյուր լումա լինի հասցեական: Այս առումով, կարող եմ ասել, որ հաջորդ տարի կենսաթոշակների ավելացում նախատեսված չէ, ինչը պայմանավորված է այսօրվա իրողություններով, ընդհանուր սոցիալական վիճակով և առաջիկայում այն խնդիրներով, որոնք պատրաստվում ենք լուծել»:

Լևոն Զուրաբյանն էլ արձագանքեց, որ այս կառավարությունից ոչ մի հեռանկար սպասել պետք չէ: Ինչ վերաբերում է հասարակության ծերացմանն, ապա գործազրկության պատճառով երիտասարդությունը հեռանում է երկրից: «Եթե նույնիսկ այդ հսկայական կապիտալի ներհոսքը դադարեցվի, բյուջեի վատնումը կասեցվի, դա բավարար միջոց կլինի կենսաթոշակների կրկնակի ու եռակի բարձրացման համար»,- ասաց նա: