PepsiCo-ն կնվազեցնի շաքարի պարունակությունն իր ըմպելիքներում

PepsiCo Inc-ը, որը գազավորված ըմպելիքների՝ մեծությամբ երկրորդ արտադրողն է աշխարհում, նպատակ է դրել մինչեւ 2025 թվականը նվազեցնել շաքարի, նատրիումի եւ հագեցած ճարպերի պարունակությունն իր արտադրանքում: Այդ մասին գրում է Fortune հրատարակությունը:

Մասնավորապես, ընկերությունը մտադիր է հասնել այն բանին, որ մինչեւ 2025 թվականն իր ըմպելիքների առնվազն երկու երրորդը 12 հեղուկ ունցիայի չափով (շուրջ 360 մլ) մեկ ստանդարտ բանկայի հաշվով 100-ից պակաս կալորիա պարունակի: Այժմ Pepsi-ի ապրանքային շարքում ցածրկալորիականությամբ գազավորված ըմպելիքների բաժինը կազմում է շուրջ 40 տոկոս:

Նպատակին հասնելու համար ընկերությունը մտադիր է ընդլայնել շաքարի ցածր պարունակությամբ ըմպելիքների տեսականին, ինչպես նաեւ փոփոխություններ մտցնել գոյություն ունեցող ըմպելիքների բաղադրակազմում:

Սեպտեմբերին Առողջապահության համաշխարհային կազմակերպությունը պետություններին հանձնարարել է հարկեր սահմանել քաղցր գազավորված ըմպելիքների վրա: Այդ քայլին արդեն որոշել են գնալ Ֆրանսիայի եւ Մեքսիկայի իշխանությունները՝ հույս ունենալով նվազեցնել նմանօրինակ արտադրանքի գործածումը եւ բարելավել բնակչության առողջությունը, հաղորդել է «Ինտերֆաքս» գործակալությունը: